2015-12-21 11:34

დღეს წარმოდგენილი კვლევის საველე სამუშაოები ჩატარდა 17 ნოემბერი - 7 დეკემბრის პერიოდში. საქართველოს მასშტაბით გამოიკითხა 1881 ადამიანი. NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC-საქართველო.

გამოკითხულთა 45% თვლის, რომ საქართველო არასწორი მიმართულებით ვითარდება, აპრილის გამოკითხვაში მაჩვენებელი 37% იყო. 31% ფიქრობს, რომ საქართველო საერთოდ არ იცვლება, ხოლო 18% - სწორი მიმართულებით ვითარდება.

რესპონდენტთა 53% მიიჩნევს, რომ რუსთავი ორის მფლობელობასთან დაკავშირებული დავა არის უმთავრესად პოლიტიკურად მოტივირებული და ემსახურება მედიის თავისუფლების შეზღუდვას. გამოკითხულთა 13% ამ მოსაზრებას არც "ეთანხმება" და არც "არ ეთანხმება". კვლევაში მონაწილეთა 12% არ ეთანხმება, ხოლო 11%-მა არ იცის.

გამოკითხულთა 69%-ისთვის მისაღებია ხელისუფლების გაცხადებული მიზანი, რომ საქართველო გახდეს NATO-ს წევრი, 21% კი ფიქრობს, რომ მიუღებელია. მათი 57%, ვისთვისაც საქართველოს NATO-ს წევრობა მისაღებია, თვლის, რომ ეს ქვეყანას უსაფრთხოებას მოუტანს, 49% - ეს გააუმჯობესებს ეკონომიკას, 20% - ეს ხელს შეუწყობს წევრ ქვეყნებთან უვიზო მიმოსვლას, 16% - ეს გაზრდის ტერიტორიული მთლიანობის აღდგენის შესაძლებლობებს.

გამოკითხულთა 24% მიიჩნევს, რომ საქართველო უნდა გაწევრიანდეს ევრაზიულ კავშირში, ხოლო 58% ევროკავშირს ემხრობა. გამოკითხულთა 8% არცერთ მოსაზრებას არ ეთანხმება, 8%-მა არ იცის, ხოლო 2% პასუხზე უარს აცხადებს. აღსანიშნავია, რომ აგვისტოს კვლევასთან შედარებით შემცირებულია იმ რესპონდენტთა რაოდენობა, ვინც ევრაზიულ კავშირს ირჩევს. აგვისტოში ამ მოსაზრებას 28% ეთანხმებოდა. ასევე, გაზრდილია ევროკავშირში გაწევრიანების მსურველთა პროცენტული მაჩვენებელი. აგვისტოს კვლევით ევროკავშირში საქართველოს გაწევრიანებას კვლევაში მონაწილეთა 47% უჭერდა მხარს.

გამოკითხულთა 60%-ს არ აქვს გადაწყვეტილი, ვის მისცემს ხმას, ხვალ რომ საპარლამენტო არჩევნები ტარდებოდეს, 35%-ს გადაწყვეტილი აქვს. მათი 30%, ვისაც გადაწყვეტილი აქვს, ხმას ქართულ ოცნებას აძლევს, 25% - ერთიან ნაციონალური მოძრაობას, თავისუფალ დემოკრატებს 12%, 6-6% კი ლეიბორისტულ პარტიასა და გაერთიანებულ დემოკრატიულ მოძრაობას, საქართველოს პატრიოტთა ალიანსს - 5%.

ხვალ რომ საპარლამენტო არჩევნები იყოს, "ქართულ ოცნებას" ხმას გამოკითხულთა 16% მისცემდა, ხოლო "ნაციონალურ მოძრაობას" 10%. კითხვაზე, ხვალ რომ საპარლამენტო არჩევნები იყოს ვის მისცემდით ხმას, გამოკითხულთა 35% აცხადებს, რომ ჯერ არ იცის. კითხვაზე პასუხის გაცემაზე უარი განაცხადა გამოკითხულთა 15%-მა. 7% კი აცხადებს, რომ ხმას "თავისუფალ დემოკრატებს" მისცემდა. 

კვლევაში მონაწილეთა 58%-ზე გავლენას მოახდენს პარტიის საარჩევნო პროგრამა და დაპირებები, 43%-ზე ახლობლების პოლიტიკური შეხედულებები, ხოლო 41%-ზე მრევლის და მღვდლის პოლიტიკური შეხედულებები. 

"ტაბულის" მიხედვით