ნებისმიერი პირი, ვინც მსგავს შეცდომას დაუშვებს, უმკაცრესად დაისჯება-ამ კომენტარით საქართველოს პრემიერ-მინისტრი მერიის მაღალჩინოსნის, ჯოკია ბოდოკიას, დაკავებას გამოეხმაურა.
მისი თქმით, საქართველო არის მსოფლიოში აღიარებული, როგორც ერთ-ერთი ლიდერი ქვეყანა კორუფციის დაბალი მაჩვენებლით და მთავრობა ამ მონაცემის გაუარესებას არ დაუშვებს.
„კორუფციასთან ბრძოლის მიმართულებით ხელისუფლება აქტიურ პოლიტიკას აწარმოებს და ყველა საჯარო მოხელე, ყველა პირი, ვინც მსგავს შეცდომას ჩაიდენს ან აპირებს ამის გაკეთებას, მინდა, იყოს დარწმუნებული, რომ ისინი იქნებიან დასჯილი ძალიან მკაცრად. საქართველოს მთავრობამ მიაღწია იმას, რომ მე-11-ე ადგილზე ვართ მსოფლიოში კორუფციის ყველაზე დაბალი მაჩვენებლით და ამის გაუარესების უფლებას არ მივცემთ არავის,“ - განაცხადა პრემიერმა.
მერიის მოქმედი მაღალჩინოსანი ანტიკორუფციულმა სააგენტომ დიდი ოდენობით, 180 000 აშს დოლარის ქრთამის აღების ფაქტზე გუშინ დააკავა.