2015-02-11 00:27

საქართველოს ყოფილი პროკურორის მურთაზ ზოდელავას განცხადებით, FBI -ს დასკვნის ნაწილის გასაიდუმლოება თავის დროზე, პოლიტიკური გადაწყვეტილება იყო და ასევე, ზურაბ ჟვანიას ოჯახის თხოვნაც გაითვალისწინეს, რომელიც დოკუმენტის გასაიდუმლოებას ითხოვდა. 

ზოდელავა აცხადებს, რომ ზურაბ ჟვანიას ოჯახის წევრები, მათ შორის გოგლა ჟვანიაც, გაცნობილი არიან დასკვნას და კარგად იციან პირადი ცხოვრების იმ დეტალების შესახებ, რაც მასშია ასახული. მისივე თქმით, თავად ის ფაქტი, რომ ორივე გარდაცვლილის დნმ აღმოჩნდა ბინაში არსებულ სხვადასხვა ნივთზე, უკვე მიანიშნებს, რომ ბინა არა ერთჯერადად, არამედ მრავალჯერ იყო გამოყენებული.

მურთაზ ზოდელავა აცხადებს, რომ პროკურატურა საქმეს აყალბებს, მითს ჰქმნის და ამ მითს კონკრეტულ ადამიანებს სწირავს:

"ეს არის ის მითი, რომელიც გამოიყენეს პოლიტიკურმა ნაწილმა და პოლიტიკოსებმა დივიდენდებისათვის, მაგრამ რეალობა სხვა არის.

არსებობს მითი, რომელსაც ბოლო 2 წელია, კვებავენ კონკრეტული ადამიანებით, სწირავენ კონკრეტულ ადამიანებს და არ არის გამორიცხული, გაგრძელდეს ეს აბსურდის თეატრი," - განაცხადა მურთაზ ზოდელავამ "არჩევანში".