"პრაიმტაიმნიუსთან" საუბარში ზურაბ ჟვანიას ძმა გოგლა ეხმიანება "რუსთავი-2"-ზე გასაჯაროვებულ FBI-ს დასკვნას და ამ ნაბიჯს "საცოდავების უკანასკნელ შანსს" უწოდებს. მისი თქმით, ეს პიკანტური დეტალები სინამდვილეში არ არსებობს და ნაციონალების შეთითხნილია.
„ეს არის ერთადერთი გზა, რაც დარჩა „ნაციონალურ მოძრაობას“. როდესაც პასუხები არ აქვთ სწორედ, ასეთი მეთოდებით ცდილობენ ადამიანი, ლაფში ამოავლონ. მათთვის არ აქვს მნიშვნელობა, ეს ადამაინი ცოცხალია თუ არა. ეს პიკანტური დეტალები, რომელზეც თითქოს ესენი საუბრობენ უკვე საიდუმლო არავისთვის აღარ არის.
მრავალჯერ ისაუბრეს და ყველამ კარგად იცის რა ვერსიაც არის შეთითხნილი. მე არასდროს ამირიდებია ამ თემაზე საუბრისგან თავი. ეს არის ამ საცოდავების უკანასკნელი შანსი. ეს პიკანტური დეტალები იმიტომ შეთხზეს, რომ ჩვენ, ოჯახი გავჩერებულიყავით, მაგრამ შედეგს ვერ მიაღწიეს და ვერც მიაღწევენ. უკვე ხედავენ და გრძნობენ რომ შედეგი დაიდება და გამოძიება სწორ გზაზე დგას.
რაც შეეხება FBI-ის დასკვნას, ამ დასკვნაში მათთვის სასარგებლო არაფერი არ წერია. თუ ისინი გამოაჩენენ დასკვნის რაღაც ნაგლეჯს, ესეც, მხოლოდ იმიტომ, რომ გვაჩვენონ, თითქოს რაღაც არსებობს, სინამდვილეში კი არაფერი ეგეთი არ არსებობს“, – აცხადებს გოგლა ჟვანია Prime Time News-თან საუბარში.
შეგახსენებთ, გადაცემა "არჩევანში" დღეს FBI-ის დასკვნა გასაჯაროვდა, რომლის მიხედვითაც ჟვანიასა და უსუპოვის დნმ-ის კვალი ბინაში აღმოჩენილია არამხოლოდ ნივთებსა და ნამწვებზე, არამედ ხალათებზე, ზეწარსა და ბალიშის პირებზეც.
