2015-02-10 10:03

გურჯაანის მუნიციპალიტეტის საკრებულოს სხდომაზე ინციდენტი მოხდა.

საკრებულოს წევრმა ზურაბ სეფიაშვილმა კითხვაზე - რატომ დაიხარჯა წინასაახალწლოდ მხოლოდ 10 500 ლარი სოციალურად დაუცველთა დასახმარებლად და 193 400 ლარი პრემიებზე, „ქართული ოცნების“ დეპუტატებისგან პასუხად მიიღო, რომ  პრემიები პატრიარქის მიერ არის ნაკურთხი.

„მე მქონდა ინიციატივა, რომ პრემიებისთვის გათვალისწინებული თანხა მიგვემართა სოციალურად დაუცველების დასახმარებლად.

ამათ ჩემი წინადადების იგნორირება მოახდინეს. 10 500 ლარი გახარჯეს სოციალურად დაუცველებისთვის და 193 400 გაიწერეს პრემიები.

რა გამოდის? ესენი საკუთარ ოჯახებზე და კეთილდღეობაზე 18 - ჯერ მეტად ზრუნავენ, ვიდრე სოციალურად დაუცველებზე“ - განაცხადა გურჯაანის საკრებულოს წევრმა ზურაბ სეფიაშვილმა.

აღნიშნულის გამო საკრებულოს წევრმა „ქართული ოცნებიდან“, სოციალურ საკითხთა კომისიის ხელმძღვანელმა ზაქარია ქაჩლიშვილმა ზურაბ სეფიაშვილს შეურაცხყოფაც მიაყენა.

„თქვენ მიდიხართ თბილისში, ტაქსაობთ, ფულს აკეთებთ, ჩამოდიხართ და აქ ვიღაცეებს ბრალს უყენებ.

მე ვიცი შენ ფულს ვინც გიხდიან. დეპუტატებს ფულს ართმევ, იდებ ჯიბეში უნამუსოდ და აქ ბრალ სდებ პატიოსან ხალხს“, – მიმართა ქაჩლიშვილმა სეფიაშვილს.

http://ick.ge/