-
2015-02-06 16:14
საპარლამენტო უმცირესობის წევრი, "ნაციონალური მოძრაობის" ერთერთი ლიდერი ირმა ნადირაშვილი პარლამენტის სხდომაზე ამბობს, რომ "ქართული ოცნება" არათუ მიცვალებულების თემის ტრიალით მოვიდა ხელისუფლებაში, არამედ ორი წელია, ამ თემის ტრიალით ინარჩუნებს თანამდებობებს.
ირმა ნადირაშვილმა უმრავლესობის წევრის ნუკრი ქანთარიას გამოსვლას უპასუხა, რომელმაც "ნაციონალურ მოძრაობას" კიდევ ერთხელ დასდო ბრალი ადამიანების მკვლელობაში:
"ადვილია, ყველა ჯერზე ხელის ჩვენსკენ გამოშვერა და "მკვლელის" ძახილი? ადვილია, მე თქვენ გეკითხებით? არ დაგავიწყდეთ, რომ თქვენმა ჭორიკანა პროკურორმა, კბილაშვილმა პირდაპირ მადლობა გადაუხადა იმ მიცვალებულებს და თქვა, რომ არა ისინი, ჩვენ თანამდებობებზე ვერ მოვიდოდითო, ეს ჩემი მოგონილი არ არის...
ახლა კიდევ, რამდენჯერაც ლარი გაუფასურდება, რამდენჯერაც მეცხრე ბლოკი გაგეთიშებათ და ეკონომიკა თავზე ჩამოგენგრევათ, მაშინვე ჩვენსკენ იშვერთ ხელს და მიცვალებულების თემას ატრიალებთ. არ დაგავიწყდეთ, რა გამოცდილება გაქვთ ბარბარე რაფალიანცთან დაკავშირებით, როცა გამოდექით და ჩვენ და გიორგი ღვინიაშვილს "მკვლელები" გვეზახეთ და ეს საქმე თქვენ მოგიბრუნდათ უკან. ასევე მოგიბრუნდებათ იური ვაზაგაშვილის მკვლელობის საქმეც და ამას მალე ვნახავთ...", - განაცხადა ირმა ნადირაშვილმა.