2014-04-28 20:35

„რეპორტიორის“ ჟურნალისტ სოფო ყარალაშვილისთვის აღმკვეთ ღონისძიებად პატიმრობის შეფარდება პროკურატურამ მისი ინტელექტუალობის გამო მოითხოვა. ამის შესახებ თავად ჟურნალისტი ამბობს.

ე.წ. „ჯეკპოტის აფიორაში“ მონაწილეობის ბრალდებით დაკავებული ჟურნალისტი სასამართლო სხდომის დეტალებს იხსენებს:

„პროკურატურა აღკვეთის ღონისძიების სახით ჩემს დაპატიმრებას ითხოვდა. პროკურორმა ისეთი ფრაზა თქვა, დარბაზში ყველას სიცილი წასკდა. მისი თქმით, ჩემი დარბაზიდან განთავისუფლება იმიტომ არ შეიძლებოდა, რომ ინტელექტუალი ვარ და შესაძლოა გარეთ გასვლის შემთხვევაში რამე მოიფიქროსო. მოსამართლემ უპასუხა, რომ ამის გამო ციხეში არავის სვამდნენ. ამჯერად საქმეზე მეტის თქმის უფლება არ მაქვს. ველოდები მორიგ სასამართლო პროცესს. ვაპირებ ჩემი სიმართლისთვის ბოლომდე ვიბრძოლო", - განაცხადა მან „რეპორტიორთან“ საუბარში.

ჟურნალისტი მოგებული  561 176 ლარის ოდენობით ჯეკ-პოტის გადახდას ითხოვს. მან „საქართველოს ლატარიის" ბილეთი 18 აპრილს წერეთლის გამზირზე ბანკ „რესპუბლიკის" წინ იყიდა. როცა გაიგო რომ თანხა მოიგო, დარეკა საქართველოს ლატარიის კომპანიაში, სადაც დაუდასტურეს, რომ მოგებული ჰქონდა ჯეკპოტი.

შეგახსენებთ, შინაგან საქმეთა სამინისტრომ გაავრცელა ინფორმაცია, რომლის თანახმადაც საქართველოს შინაგან საქმეთა სამინისტროს სახელმწიფო უსაფრთხოების სააგენტოს და მთავარი პროკურატურის თანამშრომლებმა ჩატარებული ერთობლივი ღონისძიების შედეგად, 2014 წლის 19 აპრილს, კიბერდანაშაულის ჩადენის და დიდი ოდენობით, ჯგუფური თაღლითობის მცდელობის ფაქტები აღკვეთეს.