2014-04-28 17:12

„ერთიანი ნაციონალური მოძრაობის“ ხობის რაიონული ორგანიზაციის ყოფილი, აქტიური წევრები, რომლებიც ხობის ორი მოწვევის საკრებულოს წევრები და საკრებულოს პასუხსაგები კომისიის თავმჯდომარეები იყვნენ, ადგილობრივი თვითმმართველობის არჩევნებში „ქართული ოცნების“ სიებში მოხვდნენ.

გოჩა (გოგი) ქაჯაია, რომელიც ხობის მუნიციპალიტეტის ორივე მოწვევის საკრებულოში ეკონომიკის კომისიის თავმჯდომარე იყო, დასახელებულია კოალიცია „ქართული ოცნების“ გამგებლის კანდიდატად.

იუზა (ბორის) ჯიქია, ასევე ხობის მუნიციპალიტეტის ორივე მოწვევის საკრებულოს წევრი იყო და მუშაობდა სარევიზიო კომისიის თავმჯდომარედ, „ქართული ოცნებიდან“ იყრის კენჭს სოფელ შუა ხორგაში.

„ნაციონალური მოძრაობის“ ყოფილი და ორივე მოწვევის საკრებულოს წევრი, მურად შელია სახელდება სოფელ პირველი ხორგის დეპუტატობის კანდიდატად „ქართული ოცნებიდან“.

ამასთან, „ნაციონალური მოძრაობის“ ხობის რაიონული ორგანიზაციის ყოფილი, აქტიური წევრები სხვადასხვა სოფლებში მაჟორიტარი დეპუტატობის კანდიდატებად სახელდებიან და „ქართული ოცნების“ სიებშიც იქნებიან დასახელებულები.

მნიშვნელოვანია, რომ „ქართული ოცნების“ ხობის რაიონულ ორგანიზაციაში და მათ მხარდამჭერ წრეებში სერიოზული უკმაყოფილებაა „ქართულ ოცნებაში“ გადაპორტირებული ყოფილი ნაციონალების ხელახალი რეაბილიტაციის გამო. ამ ადამიანებს კვლავ აქვთ დაპირება და იმედი, რომ ისევ იქნებიან საკრებულოს კომისიის თავმჯდომარეები. განსაკუთრებულ აღშფოთებას იწვევს ის ფაქტი, რომ „ქართული ოცნების“ ადგილობრივი ბოსები, კერძო საუბრებში ტრაბახობენ, რომ აღნიშნული სახეები სიებში „გააპარეს“. სამწუხაროა, რომ „ქართული ოცნების“ ცენტრალურ შტაბს ატყუებენ, რაც არჩევნების შედეგებზე უსათუოდ აისახება.