სენაკში არასამთავრობო ორგანიზაცია „ქალები მშვიდობისთვის“ ადგილობრივმა ლიდერმა და „ქართული ოცნების“ აქტიურმა მხარდამჭერმა ინგა ქარდავამ „ქართული ოცნების“ მაისური პროტესტის ნიშნად გაიხადა და „ნაციონალური მოძრაობიდან“ „ქართულ ოცნებაში“ პორტირებულ პირებს გაუგზავნა.
ინგა ქარდავამ სკანდალური განცხადება გააკეთა: მისი თქმით, ცხრაწლიანი ბრძოლის მიუხედავად, აღმოაჩინა, რომ რასაც ცხრა წლის განმავლობაში ებრძოდა, იგივე მეთოდებით დღეს სენაკის საკრებულოში სწორედ „ნაციონალური მოძრაობიდან“ „ქართულ ოცნებაში“ პორტირებული პირები მოქმედებენ.
ინგა ქარდავა აცხადებს, რომ „ნაციონალურ მოძრაობაში“ დარჩნენ არა მედროვეები, არამედ პრინციპებისა და იდეების ერთგული ადამიანები და სწორედ ამიტომ მიიღო გადაწყვეტილება, „ნაციონალური მოძრაობის“ სიით ადგილობრივი თვითმმართველობის არჩევნებში მონაწილეობის შესახებ.
„აფხაზეთის ხმა“ ექსკლუზიურად გთავაზობთ ინგა ქარდავას სკანდალური განცხადების ტექსტს:
„მივესალმები სრულად საქართველოს და კერძოდ, სენაკის მოსახლეობას, ჩემს მეგობრებს და ჩემს თანამოაზრეებს, რომლებთანაც ვიბრძოდი მთელი 9 წლის განმვალობაში. ჩემი დღევანდელი სენსაციური განცხადების მიზეზია სენაკში წინასაარჩევნოდ მიმდინარე პროცესები.
მე მჯეროდა ბატონი ბიძინა ივანიშვილის და ქართული ოცნების, მაგრამ სამწუხაროდ ეს ოცნება ოცნებად დარჩა არა მარტო ჩემთვის, არამედ თითქმის სრულიად საქართველოსათვის.
მე ის ადამიანი ვარ, რომელმაც ვიბრძოლე ჩემს მეგობრებთან ერთად 9 წლის განმავლობაში უსამართლობისა და უკანონობის წინააღმდეგ, მაგრამ რასაც და ვისაც ვებრძოდით 2012 წლამდე, ის ხორციელდება დღესაც სენაკში.
ის ხალხი, ვინც გვებრძოდა „ოცნებაში“ ყოფნისას, ის მედროვე, პორტირებული დღევანდელი სენაკის მაჟორიტარის გურამ მისაბიშვილის მაფიოზური კლანი გადაბარგდა „ქართულ ოცნებაში“.
ის ჯარისკაცები, რომლებიც სიცოცხლის ფასად იბრძოდნენ, იგნორირებულ იქნა „ოცნების“ ცენტრალური ლიდერების მიერ. ადამიანებს არჩევენ ფულით, ბიზნესით, მეგობარს -ძმაკაცური მეთოდებით. მე და ჩემი მეგობრები ყველაფერს გავაკეთებთ იმისთვის, რომ დავიცვათ სენაკის მოსახლეობის ინტერესები სენაკის საკრებულოში.
სენაკში სამარცხვინოა იმ ადამიანების გვერდით ბრძოლა, რომლებიც ასოცირდებიან სენაკის ქართული ოცნების კოალიციასთან. მე ჩემი გზა ღირსეულად გავიარე დღემდე.
სენაკის „ნაციონალური მოძრაობის“ ორგანიზაციაში დარჩნენ არა მედროვეები და თანამდებობებს დახარბებული ადამიანები, არამედ საკუთარი პრინციპების ერთგული, სენაკის და საქართველოს სიყვარულით გულანთებული პიროვნებები.
ზემოთქმულიდან გამომდინარე, პროტესტის ნიშნად ამ მაისურს რომელსაც როგორც ძვირფას სუვენირს წლებია ვინახავ, ვუგზავნი სენაკის „ქართული ოცნების“ პორტირებულ ლიდერებს.
მადლობა ყურადღებისათვის!!!“.