უკრაინის საზღვრებთან რუსეთის შეიარაღებული ძალების თავმოყრის გამო, სრულ საბრძოლო მზადყოფნაშია მოყვანილი უკრაინის შეიარაღებული ძალების სახმელეთო ჯარის ჰაერსაწინააღმდეგო თავდაცვის პირადი შემადგენლობა.
„ქვედანაყოფები დისლოცირებული არიან განსაზღვრულ ტერიტორიებზე, განთავსებულია საზენიტო-სარაკეტო კომპლექსი, რაც სახელმწიფო ობიექტებზე, ჯარის დისლოკაციის ადგილების და სამხედრო ნაწილების დაცვის განხორციელების საშუალებას იძლევა”, - აცხადებენ უკრაინის თავდაცვის სამინისტროს პრესსამსახურში.
უკრაინელი ადმირალის იგორ კაბანენკოს აზრით, უახლოეს პერიოდში საზღვრებთან შესაძლოა, პროვოკაციული ქმედებები გაგრძელდეს და ამავდროულად, რუსული სპეცრაზმის დახმარებით არასტაბილურობის ზონა გაფართოვდეს.
„ეს შესაძლოა, იყოს შემოჭრა “სამშვიდობო ოპერაციის” ჩატარების სახით დნეპროპეტროვსკის, ოდესისა და კიევის დაუფლების მიზნით, ამ ყველაფერს კი ინფორმაციულ-ფსიქოლოგიური ოპერაცია ახლდება თან, ჩვენი სამხედროებისა და მოსახლეობის დაშინების მიზნით”, - აცხადებს ადმირალი.
ამასთან, სეპარატისტებმა დონეცკში ტელერადიოკომიტეტის შენობა აიღეს. ფედერალიზაციის მომხრეებმა შენობაზე “დონეცკის სახალხო რესპუბლიკის” დროშა აღმართეს. დონეცკის საოლქო ტელერადიოკომპანიის შენობის ეზოში სპეცდანიშნულების დანაყოფის თანამშრომლებიც იმყოფებიან.
კიევში საგანგებო რეისით ჩადის ეუთოს გენერალური მდივანი. უკრაინის საგარეო საქმეთა მინისტრის მოვალეობის შემსრულებელის ანდრეი დეშჩიცას განცხადებით, ლაბერტო ზანიერის კიევში ჩასვლას სეპარატისტების მიერ ეუთო-ს დამკვირვებლების გატაცებას ეხება.
ეუთო-ს წარმომადგენლები 25 აპრილს სლავიანსკში დააკავეს. გატაცებულთა შორის არიან გერმანიის ოთხი, ჩეხეთის, დანიის, პოლონეთისა და შვედეთის თითო წარმომადგენელი.