2014-04-27 20:23

საყდრისის გადარჩენის კომიტეტის წევრები საბადოს მიმდებარე ტერიტორიის დატოვებას უცხოელი ექსპერტების ჩამოსვლამდე არ აპირებენ.

როგორც კომიტეტის წევრმა თორნიკე რაზმაძემ განაცხადა, ისინი დაელოდებიან ექსპერტების ჩასვლას საყდრისში და მხოლოდ ამის შემდეგ გადაწყვეტენ მომავალში რას მოიმოქმედებენ ისტორიული საბადოს დაცვის მიზნით.

"ჩვენ აქამდეც ვიცოდით, რომ ამ ბრძოლაში მარტონი არ ვიყავით, მაგრამ დღეს დიპლომატიური კორპუსის წარმომადგენლების, მომღერალ რობი კუხიანიძის ჩამოსვლის შემდეგ, კიდევ უფრო თავდაჯერებულები ვართ.

უბრალოდ სამწუხაროა, არსებობს ადამინთა ჯგუფი, რომელსაც უცნაურად არ მიაჩნია ის, რომ კულტურული მემკვიდრეობის დაცვის სააგენტოს თავმჯდომარე ხელს უწყობს კულტურული მემკვიდრეობის ძეგლის ნგრევას და რატომღაც უცნაურად მიაჩნიათ ის ფაქტი, რომ აქ შეკრებილი ახალგაზრდები მხოლოდ ენთუზიაზმით არიან და არავისგან ფინანსდებიან. აი ეს არის ცოტა სამწუხარო", - აღნიშნა თორნიკე რაზმაძემ.

საყდრისში დღეს შვეიცარიის ელჩი საქართველოში და გერმანიის ელჩის მოადგილე იმყოფებოდნენ. საყდრისის გადარჩენის კომიტეტის წევრების მხარდასაჭერად მომღერალი რობი კუხიანიძე და უფლებადამცველი ლაშა ჩხარტიშვილიც ჩავიდნენ.

საყდრისში BBC-ის გადამღები ჯგუფიც იყო ჩასული. უცხოელი ჟურნალისტები საბადოს გარშემო განვითარებულ მოვლენებსა და საპროტესტო აქციებზე სპეციალურ რეპორტაჟს ამზადებენ.