საქართველოს მესამე პრეზიდენტი მიხეილ სააკაშვილი ამბობს, რომ მის მიმართ სისხლის სამართლებრივი დევნის დაწყება პირადად ბიძინა ივანიშვილმა გადაწყვიტა, ხოლო მას შემდეგ, რაც სანქციებითა და საფრანგეთის მოქალაქეობის გადახედვით დაემუქრნენ, ამაზე ხელი აიღო.
მიხეილ სააკაშვილის თქმით, ყველაფერი „ერთმა კაცმა გადაწყვიტა, რომელიც ისეთ შუშის სასახლეში ზის, სადაც ხალხს არ უშვებენ“, ეს კი აშშ-ში მთავრობის წევრების ვიზიტის შემდეგ მოხდა:
„ეს თეთრ სახლში ვიზიტის შემდეგ გადაწყვიტეს, რომ ახლა კარგად გვაქვს საქმეო და თავისი სანუკვარი ოცნებები აესრულებინათ, ის ვალდებულებები, რაც რუსეთთან ჰქონდათ, გაინაღდონ, თავისი პირადი ინსტიქტები დაიკმაყოფილონ, რის შემდეგაც მოხდა ასეთი რამ, თქვეს რომ ახლავე დავაკავებთ და მერე ეს ყველაფერი უკან წაიღეს. თქვენ გგონიათ მათში სინდისმა გაიღვიძა და უცებ გონება გაუნათდათ? რა თქმა უნდა, არა.
სინამდვილეში იყო ასე, რომ ამერიკის ძალიან მაღალი თანამდებობის პირმა დაურეკა ჩვენ საგარეო მინისტრს, ელჩი მოვიდა წერილით ამერიკიდან და უთხრა, რომ თქვენ ეტყობა, ვერაფერი ვერ გაიგეთ, ვიცე-პრეზიდენტი ბაიდენი დიდხანს ესაუბრა ღარიბაშვილს, რომ ეს არ გააკეთოს. უთხრეს, რომ ძალიან გაბრაზებულები არიან და ეს მთავრობას დაუჯდება ძვირადო.
გაფრთხილება იყო არა ღარიბაშვილზე, ან ვიღაც პროკურორზე უთხრეს, რომ პირადად ივანიშვილს დაუწესებდნენ სანქციებს. ამაზე ევროკავშირის მაღალი დონის ხელმძღვანელებმა ისაუბრეს, ეს პრაქტიკა რუსეთის ხელმძღვანელების მიმართ ახლა არსებობს და ივანიშვილი ბევრად ნაკლები სამიზნეა მისთვის და უთხრეს, რომ შენ ანგარიშებს დავაყადაღებთ, სანქციებს დაგიწესებთ, ფრანგულ მოქალაქეობას გადავხედავთ, ვეღარ გადაადგილდები და პრობლემები გექნებაო, ეს იყო მთელი ისტორია”, - განაცხადა მიხეილ სააკაშვილმა აშშ-დან პირდაპირი ჩართვის დროს.
