საქართველოს თავდაცვის მინისტრი ირაკლი ალასანია „კვირის პალიტრისთვის“ მიცემულ ინტერვიუში უარყოფს ჭორებს „ნაციონალურ მოძრაობასთან“ მისი კავშირის არსებობის შესახებ:
"ეს უსაფუძვლო ჭორებია. მეცინება, როდესაც "ნაციონალურ მოძრაობასთან" ჩემს კავშირებზე ლაპარაკობენ. მე "ნაციონალურ მოძრაობას" აღვიქვამ როგორც პოლიტიკურ ძალას, რომელთანაც არ უნდა გვქონდეს დაძაბული ურთიერთობა. კარგად მესმის მათი, ვისაც ძალიან ცუდად მოექცა სააკაშვილის ხელისუფლება, ვისაც დევნიდნენ და უდანაშუალოდ გამოამწყვდიეს ციხეში. ვიცი, რომ მათთვის ეს ძალიან მტკივნეული საკითხია და მინდა ვუთხრა: ჩვენი შვილების მომავლისთვის აუცილებელია, არ დავუშვათ ძალადობა პოლიტიკური ოპოზიციის მიმართ. ქვეყნის მომავლისთვის მნიშვნელოვანია, გავითვალისწინოთ ის საფრთხეები, რაც ქვეყანას ემუქრება და არ დავანახოთ სამყაროს, რომ შიგნიდან ვართ გახლეჩილი. აქედან გამომდინარე, მოთმინება და "ნაციონალური მოძრაობისთვის" რაღაცეების პატიება მოგვიწევს. ეს შემიძლია მე ვთქვა, რადგან შევძელი და ვაპატიე აფხაზებს, რომლებმაც მამა დამიხვრიტეს", - განაცხადა ალასანიამ და ამმხრივ წინასაარჩევნოდ გამოცხადებული მორატორიუმის მნიშვნელობასაც გაუსვა ხაზი.
