21 აპრილის საღამოსა და ღამის განმავლობაში საცობების გამო გართულებული იყო ავტოტრანსპორტის მოძრაობა დასავლეთ და აღმოსავლეთ საქართველოს დამაკავშირებელ ავტომაგისტრალზე.
საცობები ავტომანქანების ქაოტურმა მოძრაობამ გამოიწვია. განსაკუთრებით ჭირდა გადაადგილება ქუთაისიდან თბილისის მიმართულებით, რიკოთის უღელტეხილის ცალკეულ მონაკვეთებზე და აგარასთან. როგორც "აფხაზეთის ხმის" ჟურნალისტი ადგილიდან იუწყება, ავტომანქანებმა ახლადდაგებულ გზაზე თვითნებურად გადაუხვიეს, მაგრამ მცირე მანძილის შემდეგ იძულებულნი გახდნენ, უკან მობრუნებულიყვნენ, რადგან მოქმედ გზასთან შეერთება საგზაო ტექნიკით დახვდათ ჩაკეტილი.
იმის გამო, რომ თითქმის მთელი ღამის განმავლობაში წვიმდა, ხშირი იყო ავტოსაგზაო შემთხვევები, ხოლო საცობების გამო რამდენიმე ადგილამდე დიდი ხნის დაგვიანებით მივიდნენ მაშველები. ავტომანქანების ნაკადის მოზღვავება სააღდგომო დღესასწაულების დასრულებითაა გამოწვეული. ღამის საათებში ტრანსპორტის გადაადგილება იმდენად ჭირდა, რომ ქუთაისიდან თბილისამდე მანძილის დაფარვას დაახლოებით ოთხიდან ხუთ საათამდე სჭირდებოდა. სავარაუდოდ, აღნიშნულ მაგისტრალზე საცობი დღესაც წარმოიქმნება.
