„რია ნოვოსტისა“ და „როსია სეგოდნიას“ ჟურნალისტი სტელა დუბოვიცკაია, რომელსაც ბრიფინგზე შეურაცხყოფა ვლადიმირ ჟირინოვსკიმ მიაყენა, საავადმყოფოში მოხვდა:
„ჩემი იმედი, რომ მეორე ორსულობა ჰოსპიტალიზაციის გარეშე ჩაივლიდა, არ გამართლდა. ვწევარ და წვეთოვანი სიტემა მაქვს ჩართული - უძილო ღამე მუდმივი მეთვალყურეობის ქვეშ, მაგრამ მედპერსონალი ძალიან კარგია“, - დაწერა სტელამ „ფეისბუქზე“.
შეგახსენებთ, რომ 18 აპრილს, ბრიფინგზე დუბოვიცკაიას ჟირინოვსკიმ შეურაცხყოფა იმ დროს მიაყენა, როცა ეს უკანასკნელი დაინტერესდა, ღირდა თუ არა საპასუხო აქციების შემოღება უკრაინელებისთვის იმის გამო, რომ მათ რუსეთის მოქალაქეების უკრაინაში შესვლა ფასიანი გახადეს:
„არა, რა სანქციები, სინაზეა საჭირო...“, - ირონიულად განაცხადა მან და ზურგსუკან მდგარ დაცვის თანამშრომელს მოუხმო, რომელსაც უთხრა:
„მოდი, ახლა მე რაღაცას ვიყვირებ, შენ კი მიირბინე მასთან (მიანიშნა ჟურნალისტზე) და დაიწყე სასტიკი ძალადობა“, - ამის შემდეგ ჟირინოვსკიმ რამდენჯერმე წამოიძახა: „ქრისტე აღდგა! ჭეშმარიტად აღდგა! რას ელოდები, მოეხვიე, აკოცე მას!“, - მიმართა პოლიტიკოსმა დაცვას, რომელიც ჟურნალისტ გოგონას მოეპოტინა, თუმცა მას და ჟურნალისტს შორის სხვა კოლეგები ჩადგნენ.
ამ ფაქტის გამო ჟურნალისტებმა დუმას მიმართეს და ჟირინოვსკისგან საჯაროდ ბოდიშის მოხდა მოითხოვეს, ასევე, რუსეთის ეკლესიის სახელით გაკეთებულ განცხადებაშიც, ჟირინოვსკის მონანიება ურჩიეს, მაგრამ მას არც ჟურნალისტების თხოვნა გაუთვალისწინებია და არც ეკლესიის.