"TV3"-ის ჟურნალისტებს, რომლებიც სოფელ აძვში გუშინ რუსმა ოკუპანტებმა გაიტაცეს, სავარაუდოდ, დღეს გაათავისუფლებენ. ამის შესახებ ჟურნალისტებს ტელეკომპანიის ხელმძღვანელმა განუცხადა. მისი თქმით, დაკავებული ჟურნალისტები ცხინვალში გადაიყვანეს.
ტელეკომპანიის ხელმძღვანელობა აცხადებს, რომ ჟურნალისტები თავს კარგად გრძნობენ და მათზე ზეწოლა არ მომხდარა. იმ შემთხვევაში, თუ ჟურნალისტებს დღეს არ გაათავისუფლებენ, ტელეკომპანია შეხვდება დიპლომატიური კორპუსის წარმომადგენლებს და "ქმედით ღონისძიებებზე გადავა".
ქართველი ჟურნალისტების გათავისუფლების საკითხი იქნება ერთ-ერთი მთავარი გრიგორი კარასინთან ზურაბ აბაშიძის შეხვედრის დროს. აბაშიძის განცხადებით, მან კარასინთან დაკავშირება 15 აპრილსაც სცადა, მაგრამ ვერ მოახერხა.