-
2014-04-16 07:53
პენტაგონის წარმომადგენელმა "არაპროფესიონალური და პროვოკაციული" უწოდა რუსეთის კუთვნილი ორი "სუ-24"-ის ქმედებას შავი ზღვის საერთაშორისო წყლებში, როცა ეს უკანასკნელები დაბალ სიმაღლეზე დაეშვნენ და რამდენჯერმე გადაუფრინეს აშშ-ს საზღვაო ძალების კუთვნილი "დონალდ კუკს".
პენტაგონის პრესმდივანმა პოლკოვნიკმა სტივენ უორენმა აღნიშნა, რომ "სუ-24"-ებს არ მოუხდენიათ რეაგირება გამაფრთხილებელ სიგნალებზე. მისივე თქმით, მათ რამდენჯერმე გადაუფრინეს "დონალდ კუკს" და ინციდენტი გართულებების გარეშე დასრულდა. პოლკოვნიკის განცხადებით, 12 აპრილს რუსული მოიერიშეების მანევრები 90 წუთის განმავლობაში გრძელდებოდა.
"რასაკვირველია, "დონალდ კუკს" შეუძლია უფრო მეტი, ვიდრე ორი მოიერიშის მოგერიებაა", - განაცხადა პოლკოვნიკმა უორენმა და დაამატა: - "მიჭირს დავიჯერო, რომ ორი რუსი პილოტი თავად აირჩევდა, საით უნდა გაფრენილიყო".
პენტაგონის პრესმდივანმა ხაზი გაუსვა, რომ "დონალდ კუკს" გააჩნია დიდი საბრძოლო შეიარაღება, მათ შორის, ტორპედოები და ფრთოსანი რაკეტები "ტომაჰავკი".