2014-04-12 08:28

თბილისის უფლებამოსილებაშეჩერებული მერი გიგი უგულავა დღეს ფინანსთა სამინსიტროს საგამოძიებო სამსახურში დაკითხვაზეა დაბარებული, თუმცა „ნაციონალური მოძრაობის“ ერთერთი ლიდერი იქ მისვლას არ აპირებს.

ინფორმაცია დაკითხვაზე დაბარებისა და არწასვლის მიზეზების შესახებ გიგი უგულავამ „ფეისბუქის“ საკუთარ გვერდზე გამოაქვეყნა:

"ერთი ამბის მოყოლა ძლივს დავამთავრე და მეორე დაიწყო: ბატონო გიორგი, ფინანსთა სამინისტროს საგამოძიებო სამსახურიდან გაწუხებთ გამომძიებელი გიორგი კვარაცხელია, ხვალ, 11:00 საათზე ხართ დაბარებული საგამოძიებო სამსახურში მოწმის სახით დაკითხვის მიზნით, სისხლის სამართლის 092250613004 საქმეზე, რაც ეხება თბილისის მერიასა და "სითი პარკს შორის დადებულ ხელშეკრულებებს. მისამართი უნივერსიტეტის ქ. #2ა.

ხვალ ზუგდიდში აქცია გვაქვს. მერობის, გამგებლობისა და მაჟორიტარ კანდიდატებს წარვადგენთ, ვერ მივალ. მერე ნებისმიერ დროს, აბა ხალხს ხომ არ ვაფიქრებინებ, ბოკერიამ გაასწროო", - წერს უგულავა. მოგვიანებით მან "ფეისბუქიდანვე" სთხოვა ფინანსთა სამინისტროს საგამოძიებო სამსახურს, მხედველობაში მიიღონ, რომ ზუგდიდის განყოფილებაში, 13:00-ზე გამოცხადდება.

შეგახსენებთ, მანამდე გიგი უგულავამ დაწერა, რომ დაკითხვაზე მისი სიმამრიც დაიბარეს.