2014-04-10 14:22

საქართველოს სახალხო დამცველი ხურჩის მოსახლეობაზე დაყრდნობით აცხადებს, რომ რუსმა სამხედროებმა ზუგდიდის რაიონის სოფელ ხურჩიდან მამაკაცი გაიტაცეს, რომელიც ყანაში მუშაობდა. ის რუსულ სამხედრო ბაზაზეა გადაყვანილი, რომელიც ხურჩის მოსაზღვრე, გალის რაიონის სოფელ ნაბაკევში მდებარეობს.

„დღეს მითხრეს ადგილობრივებმა, რომ მსგავსი ფაქტი გუშინაც დაფიქსირდა სოფელში. გუშინ საყანე მიწის დამუშავებისას ერთ-ერთი პირი გაიტაცეს და როგორც მითხრეს, რუს მესაზღვრეებს ბაზაზე ჰყავთ გადაყვანილი“, - განაცხადა სახალხო დამცველმა.

შეგახსენებთ, ხურჩა ის სოფელია, სადაც რამდენიმე დღის წინ საქართველოს პრემიერმინისტრი იმყოფებოდა და ახლადგარემონტებული გზის გახსნას დაესწრო. იმ დღეს, როცა პრემიერი ზუგდიდში, დადიანების სასახლის ეზოში სიტყვით გამოდიოდა, კიდევ ერთი გატაცება მოხდა რუსი ოკუპანტების მხრიდან: მათ ზუგდიდის რაიონის სოფელ შამგონაში მცხოვრები ახალგაზრდა მამაკაცი გაიტაცეს.

რაც შეეხება სახალხო დამცველს, უჩა ნანუაშვილი ხურჩის საბავშვო ბაღში მოსახლეობას შეხვდა და სოფლის პრობლემები მოისმინა. ადგილობრივი მკვიდრის ნაზი ტუკვაძის განცხადებით, მათთვის მთავარ პრობლემას მიწების დამუშავება წარმოადგენს, რადგან სასოფლო-სამეურნეო მიწების დიდი ნაწილი ოკუპირებულ ტერიტორიაზეა.

ადგილობრივმა მოსახლეობამ ერთ-ერთ მთავარ პრობლემად დაასახელა ისიც, რომ ელექტროენერგიას ოკუპირებული რეგიონიდან იღებენ და ხშირ შემთხვევაში მისი სიმძლავრე დაბალი და გამოუსადეგარია.

უჩა ნანუაშვილმა განაცხადა, რომ შეისწავლის ყველა პრობლემას, რომელიც სოფელში არსებობს და შესაბამის რეკომენდაციებს მთავრობას მიაწვდის.