2014-04-08 22:43

საქართველოს თავდაცვის მინისტრი ირაკლი ალასანია შს მინისტრის განცხადებას ეხმაურება.

ალასანიამ „რუსთავი 2“-ის გადაცემა „არჩევანში“ აღნიშნა, რომ ალექსანდრე ჭიკაიძის განცხადება ემსახურება იმას, რომ თავიდან იქნას აცილებული შესაძლო დესტაბილიზაციის მცდელობები:

„მე მსურს გითხრათ რომ შინაგან საქმეთა სამინისტროს თავისი კომპეტენცია აქვს და მათი ამოცანა არის ის, რომ ქვეყანაში არეულობა და დესტაბილიზაცია არ დაუშვას. ჩვენ დიდ წინსვლას ველოდებით და მათი ყურადრება კონცენტრირებული იქნება სხვადასხვა ფაქტორებზე. დღეს პრემირმინისტრმა გააკეთა განცხადება, რომ არაფერი აქ საგანგაშო არ არის. თავდაცვის სამინისტრო არის სრულ მზადყოფნაში რომ ნებისმიერი საფრთხე ჩვენი ძალების საშუალებით იყოს თავიდან აცილებული. ჩვენ ვაკონტროლებთ იმას, თუ რა ნაბიჯებს დგამს ჩვენი არაკეთილმოსურნე. ძალიან შეურაცხყოფილია თავდაცვის სამინისტრო, შეიარაღებული ძალები როდესაც საზოგადოების ზოგიერთი წარმომადგენლისგან ისმის განცხადებები, რომლებსაც აბსოლუტურად ამორალური ხასიათი აქვს. მეხუთე კოლონის ჩამოყალიბებას საქართველოში არავინ არ დაუშვებს, მსურს შევახსენო ყველას, რომ 2008 წელს 169 სამხედრო მოსამსახურე შეეწირა ჩვენი ქვეყნის დაცვას. როდესაც ზოგიერთი მოქალაქე გამოდის და ამორალურ განცხადებას აკეთებს, ეს შემაშფოთებელია, ვთხოვთ ყველას ძალიან წინდახედულად შეხედოს იმას, რა ხდება საქართველოში, სოკოებივით იზრდება არასამთავრობო ორგანიზაციები, რომლებიც ეჭვი მაქვს, რომ ჩვენი არაკეთილმოსურნეების მიერ არის დაფინანსებული“, - განაცხადა ირაკლი ალასანიამ.

მინისტრის თქმით, უკრაინაში არსებული არეულობა გამოიწვია იმ განწყობამ, რომ ქვეყნის თავდაცვის სამინისტროს უკრაინის დაცვის შესაძლებლობა არ აქვს:

„თუ ობიექტურ ანალიზს გავუკეთებთ იმას რაც ხდება უკრაინაში, არის შიდა გათიშულობა, შეიქმნა ისეთი განწყობა რომ საკუთარ ჯარს არ აქვს საშუალება უსაფრთხოება უზრუნველყოს. ბოლო პერიოდში, ამოძვრნენ ისეთი ძალები არსაიდან, რომელბიც ჩვენი ქვეყნის წინსვლას აკრიტიკებდნენ. ჩვენ გვაქვს სრული მობილიზება გაკეთებული იმისათვის, რომ ასეთი რამ არ დავუშვათ. ჩვენი ხელისუფლების ყველა შტო საზოგადოებასთან ერთად ერთმუშტად უნდა იყოს შეკრული“, - განაცხადა ალასანიამ.

მისივე თქმით, საქართველოს ახალ ხელისუფლებას სურს კეთილმეზობლური ურთიერთობა ნებისმიერ ქვეყანასთან:

„ჩვენ კეთილმეზობლური ურთიერთობები გვინდა ყველასთან, მათ შორის რუსეთის ფედერაციასთანაც, მაგრამ ეს არ მოხდება ჩვენი ეროვნული უსაფრთხოების ხარჯზე“, - აღნიშნა ალასანიამ.