უკრაინის საგარეო საქმეთა სამინისტრო განცხადებას ავრცელებს, რომლის მიხედვითაც რუსეთის ფედერაციას ქვეყნის ცალკეულ რეგიონებში განვითარებულ მოვლენებში ადანაშაულებს:
„პროვოკაციებს ახორციელებენ გარკვეული ჯგუფები, რომლებსაც რუსეთის სპეცსამსახურები ხელმძღვანელობენ. აგრესიული ქმედებები, რომლებიც უკრაინის მოქალაქეების სიცოცხლესა და უსაფრთხოებას საფრთხეს უქმნის, სეპარატისტული ძალების გააქტიურება და რუსეთის მოქალაქეთა კანონსაწინააღმდეგო მოქმედებები მოწმობს რუსეთის მიერ უკრაინის ოკუპაციის განხორციელების მეორე ეტაპისთვის მზადებას.
დივერსიულ საქმიანობას თან ახლავს მასშტაბური პროპაგანდისტული კამპანია, რომელიც ცინიკურად ამახინჯებს ფაქტებს, ავრცელებს სიცრუეს და მიზნად ისახავს უკრაინის შიდა საქმეებში ჩარევის გამართლებას.
უკრაინელი ხალხი არ მიიღებს სეპარატიზმსა და ფაშიზმს, რასაც აქტიურად ავრცელებენ პროვოკატორები რუსეთის სპეცსამსახურებიდან. ე.წ. უკრაინის ფედერალიზაციის იდეა, რომელსაც მოსკოვი გვახვევს თავს, ამავე სპეცგეგმის შემადგენელი ნაწილია“, - ნათქვამია უკრაინის საგარეო უწყების განცხადებაში.
