„ერთიანი ნაციონალური მოძრაობის“ წევრი დეპუტატი გიორგი ბარამიძე გამოდის ინიციატივით, რომ რუსეთის ფედერაციის მიერ საქართველოს ოკუპაციისა და ეთნიკური წმენდის უარყოფა სისხლის სამართლებრივი დანაშაული გახდეს. ამის შესახებ ბარამიძე „ფეისბუქის“ საკუთარ გვერდზე წერს:
"ბოლო დროს ქართული საზოგადოების უდიდესი ნაწილი გააოგნა ინფორმაციამ იმის შესახებ, რომ საქართველოს ზოგიერთმა მოქალაქემ რუსეთის ფედერაციის სახელმწიფო დროშა აღმართა, ზოგიერთმა კი რუსეთის მიერ საქართველოს ოკუპაცია უარყო. რადგან დღევანდელ საქართველოში ასეთი რამ, სამწუხაროდ, აქტუალური გახდა, მიმაჩნია, რომ ამ ტენდენციის შესაჩერებლად, საჭიროა მსგავსი ქმედებები შეიზღუდოს და დასჯადი გახდეს საქართველოს სისხლის სამართლის კანონმდებლობით. იმ პირობებში, როცა საქართველოში სისხლის სამართლებრივი დევნის საფუძველი ქურდული სამყაროს წევრობა და ამ სამყაროსთან იდეოლოგიური კავშირია, ალოგიკურია ჩვენი ქვეყნის ინტერესებისათვის არა ნაკლებ საფრთხის შემცველი ქმედებები დაუსჯელი რჩებოდეს, მით უფრო მაშინ, როცა საერთაშორისო პრაქტიკაში მსგავსი პრეცედენტები არსებობს. მაგალითად, ჰოლოკოსტის უარყოფა ცივილიზებული სამყაროს სხვადასხვა ქვეყნებში (ავსტრია, გერმანია, ბელგია, შვეიცარია, საფრანგეთი და ა.შ.) დასჯადია, ასევე სომხების გენოციდის უარყოფას კრძალავს არაერთი სახელმწიფო (საფრანგეთი, სლოვაკეთი, სლოვენია, არგენტინა, შვეიცარია, ურუგვაი)
მიზანშეწონილად მიმაჩნია საკანონმდებლო ცვლილების ინიცირება, რომლის მიხედვით საქართველოს სისხლის სამართლის კოდექსს დაემატება მუხლი, რომელიც რუსეთის ფედერაციის მიერ საქართველოს ოკუპაციისა და ეთნიკური წმენდის უარყოფას დასჯად ქმედებად ჩათვლის. ასევე, მოხდება ცვლილებების ინიცირება "თავისუფლების ქარტიაში" და კომუნისტურ ტოტალიტარულ და ფაშისტურ სიმბოლიკასთან ერთად ოკუპანტი სახელმწიფოს ოფიციალური სიმბოლიკის გამოყენებაც და მისი იდეოლოგიის პროპაგანდა კანონით აიკრძალება. კარგად მესმის გამოხატვის თავისუფლების შეზღუდვის საფრთხე, მაგრამ მიმაჩნია, რომ როგორც ძალადობისკენ მოწოდების აკრძალვა არ არის გამოხატვის თავისუფლების შეზღუდვა, ასევე მოძალადის მიერ ჩადენილი დანაშაულის გამართლების აკრძალვა არ უნდა განვიხილოთ გამოხატვის თავისუფლებიის შეზღუდვად", - აცხადებს ბარამიძე.
