2014-04-08 17:34

"შს მინისტრმა იმ მიუღწეველ სურვილებზე ისაუბრა, რომელიც შეიძლება ჰქონდეს რომელიმე არანორმალურ ადამიანს",- ასე შეაფასა პრემიერმა ირაკლი ღარიბაშვილმა ალექსანდრე ჭიკაიძის გუშინდელი განცხადება, რომ ოპოზიცია დესტაბილიზაციის დაწყებას გეგმავს და ევრომაიდნის თბილისში გადმოტანას აპირებს.

პრემიერი ვერ აზუსტებს, თუ რა ინფორმაციას ფლობს ჭიკაიძე, მაგრამ თვლის რომ მინისტრმა იმ საფრთხეებზე ისაუბრა, რომელიც შესაძლოა არსებობდეს ქვეყანაში.

"რა ინფორმაცია არსებობს ამასთან დაკავშირებით, დეტალურად საუბარი ჩემგან არასწორი იქნება, ამაზე ისაუბრა მინისტრმა და ჯობია, რომ მან განმარტოს. მე ვფიქრობ, რომ რაიმე საგანგაშო მასში არაფერი ყოფილა. მინისტრმა ისაუბრა იმ საფრთხეებზე, რომელიც შესაძლოა არსებობდეს ქვეყანაში და იმ მიუღწეველ სურვილებზე, რომლებიც შეიძლება ჰქონდეს რომელიმე არანორმალურ ადამიანს", - აღნიშნა ღარიბაშვილმა.

ღარიბაშვილის განცხადებით, ამ ხელისუფლების პირობებში ამ ქვეყანაში ვერავინ შეძლებს რაიმე დესტაბილიზაციის მოწყობას, ღარიბაშვილის მტკიცებით, თუ ვინმეს აღნიშნულის მცდელობა ექნება, ის ძალიან მკაცრად დაისჯება.

"ვერავინ გაბედავს რაიმე ფორმით, რაიმე სახით, რაიმე დესტაბილიზაციის მოწყობას. თუ ვინმეს ამის მცდელობა ან სურვილი ექნება, ის ძალიან მკაცრად დაისჯება- ვინც არ უნდა იყოს. მინდა ყველას მაქსიმალურად სიმშვიდისკენ მოგიწოდოთ, დაგამშვიდოთ და სრული პასუსხიმგებლობით გითხრათ, რომ ჩვენი ხელისუფლების პირობებში დესტაბილიზაციის მოწყობას ვერავინ შეძლებს", - განაცხადა ირაკლი ღარიბაშვილმა.