2014-04-04 01:17

რუსეთის ტერიტორიაზე ტერაქტების მზადების ბრალდებით ФСБ-მ 25 უკრაინელი დააკავა, მათ შორის რადიკალური ორგანიზაციის "მემარჯვენე სექტორის" აქტივისტები - ამის შესახებ "რია ნოვოსტი" იტყობინება.

სააგენტოს წყაროს ცნობით, ეჭვმიტანილებმა დაკითხვის დროს აღიარეს, რომ უკრაინის უშიშროების სამსახურის დავალებით გეგმავდნენ ტერაქტებს როსტოვის, ტვერის, ორიოლის, ბელგოროდის ოლქებში, ასევე ყალმუხეთსა და თათარსტანში.

იმისთვის, რომ არ გამოეწვიათ ეჭვი რუსეთის სპეცსამსახურებში, დაკავებულები მოქმედებდნენ უკრაინული ფირმის სახელით. "რია ნოვოსტი" საკუთარ წყაროზე დაყრდნობით წერს, რომ დაკითხვის დროს დაკავებულებმა აღიარეს უკრაინის სპეცსამსახურების დავალებით მოქმედების ფაქტი: მათ განაცხადეს, რომ უკრაინის საზღვართან ახლო რუსეთის შეიარაღებული ძალების დანაყოფების გადაადგილებას, მათ ბაზებს იღებდნენ, რათა ტერიტორია შეესწავლათ.