2014-04-03 23:28

ერითრეიში რუსეთის ელჩის იგორ ჩუბაროვისა და ზიმბაბვესა და მალავიში რუსეთის ელჩის სერგეი ბახარევის სატელეფონო საუბარი ინტერნეტში გავრცელდა.

ვიდეომასალა, სადაც საუბარია აღწერილი, "აფხაზეთი.ინფომ" გამოაქვეყნა. რუსი დიპლომატები საუბარში განიხილავენ ყირიმის საკითხისადმი გაეროს ასამბლეის დამოკიდებულებას და ჩუბაროვი ბახარევს ულოცავს, რადგან ზიმბაბვემ მხარი დაუჭირა ყირიმის ოკუპაციას, ამასთან, გამოხატავს უკმაყოფილებასაც, რომ ერითრეამ ამ საკითხზე კენჭისყრის დროს თავი შეიკავა.

ამის შემდეგ ჩუბაროვი აცხადებს, რომ ის მაინც მიაღწევს ერითრეისგან საქართველოს ოკუპირებული ტერიტორიების აღიარებას.

რუსი დიპლომატების საუბრის სკანდალური ნაწილი ამით არ ამოიწურება. ისინი შემდეგ ქილიკობენ სხვადასხვა ქვეყნებზე და იმაზე, როგორ ეუბნებიან ევროკავშირის ქვეყნების ელჩებს, რომ ყირიმის მიერთებით არ დაკმაყოფილდებიან და რუსეთი მალე აშშ-ის შტატებსაც მიიერთებს.

შეგახსენებთ, რომ ერითრეა აღმოსავლეთ აფრიკის სახელმწიფოა, რომელიც წითელი ზღვის ნაპირზე მდებარეობს. დასავლეთით ის სუდანს, სამხრეთით ეთიოპიას, ხოლო აღმოსავლეთით - ჯიბუტის ესაზღვრება. ერითრეამ დამოუკიდებლობა 1993 წელს მოიპოვა, როცა ეთიოპიას გამოეყო.