2014-04-03 16:14

ქართულმა მხარემ სასწრაფოდ უნდა გამოიძახოს რუსეთის წარმომადგენელი და პროცესის შეჩერება მოსთხოვოს, წინააღმდეგ შემთხვევაში საკონსულო დახუროს, -

„ფრონტნიუსთან“ ინტერვიუში საქართველოს საგარეო საქმეთა მინისტრის ყოფილი მოადგილე ნიკოლოზ ვაშაკიძე რუსეთის საკონსულოს მიერ საქართველოს რუსულენოვან მოსახლეობაზე რუსეთის მოქალაქეობის დამადასტურებელი დოკუმენტების მასობრივად გაცემის პროცესს ეხმიანება.

საქარველოს სახელმწიფოს სრული და ლეგიტიმური უფლება აქვს, აღკვეთოს ეს პროცესი, როცა საჭიროდ ჩათვლის“, განაცხადა ვაშაკიძემ ,,ფრონტნიუსთან“ საუბრისას.

ვაშაკიძე ზოგად საფრთხეზე ამახვილებს ყურადღებას და აღნიშნავს, რომ რუსეთი საქართველოსა და სომხეთს შორის კონფლიქტის გაღვივებას ცდილობს, რაც სომხეთის ინტერესებში არ შედის, ამდენად, რუსეთის პროვოკაციების სამიზნე ჯავახეთია.

„მზადდება ნიადაგი სამხედრო შემოჭრისთვის. „საკუთარი მოქალაქეების“ დაცვის ჰიტლერის მეთოდს პუტინი უკვე დიდი ხანია, იყენებს. ამ საბაბით სამხედრო ინტერვენციის „ლეგიტიმაცია“ რუსეთს დიდი ხანია, გაკეთებული აქვს საკუთარ „კანონმდებლობაში“.

ახლა პუტინი ფართომასშტაბიან შეტევაზეა გადასული მთელს პოსტსაბჭოურ სივრცეზე. ბუნებრივია, კავკასია მთავარი სამიზნეა. სომხურ-აზერბაიჯანული კონფლიქტის გაღვივებით და შემდგომი შენარჩუნებით რუსეთი უკვე 20 წელია, არ აძლევს ჩვენს რეგიონს ნორმალური განვითარებისა და თანამშრომლობის საშუალებას, რითაც იტოვებს შანსებს კავკასიის უკან შეერთების.

ახლა იმისათვის, რომ მშვიდობას საბოლოოდ მოუსპოს შანსი კავკასიაში, პუტინს წრის შეკვრა სჭირდება სომხეთ-საქართველოს კონფლიქტის გაღვივების სახით. სომხეთის ხელისუფლებას ეს, ცხადია, არ უნდა და ცდილობს, ამ სცენარიდან თავი დაიძვრინოს.

ამიტომ პუტინი ახლა ურიგებს რუსულ პასპორტებს ჯავახელ სომხებს, რომ მერე მოაწყოს პროვოკაცია და სომხეთში განლაგებული თავისი სამხედრო ძალები საქართველოს წინააღმდეგ აამოქმედოს“,– აღნიშნა ვაშაკიძემ.

ამ საკითხთან დაკავსირებით განცხადება კონსტანტინე გამსახურდიამაც გააკეთა, პირველი პრეზიდენტის ვაჟი ფიქრობს რომ ეს ქმედება დროულად უნდა აღიკვეთოს. თბილისში რუსეთის საელჩო სამცხე–ჯავახეთის რეგიონისა და ზოგადად საქართველოს რუსულენოვან მოსახლეობაზე რუსეთის მოქალაქეობის დამადასტურებელ მოწმობებს გამარტივებული წესით გასცემს, რის გამოც საკონსულოსთან უკვე რამდენიმე დღეა რიგი დგას.