2014-04-02 17:40

პარლამენტის სხდომაზე ზუგდიდის მაჟორიტარმა დეპუტატმა განაცხადა, რომ მას არ სჭირდება იმუნიტეტი და მზადაა, სასამართლოზე ყველა კითხვას გასცეს პასუხი.

როლანდ ახალაიას განცხადებით, მისთვის დიდი პატივი იქნება, თუკი „უფლის სიყვარულის გამო გაასამართლებენ“.

ახალაიამ პარლამენტის თავმჯდომარესაც მიმართა და აღნიშნა, რომ მისი სურვილია, საქართველოს პარლამენტს ღირსეული თავმჯდომარე ჰყავდეს:

„თქვენ გინდათ უფლის სიყვარულისთვის გამასამართლოთ და ვერ ხვდებით, რომ ეს დიდი პატივია ჩემთვის. უმრავლესობა ცდილობდით არ გეცნოთ ჩემი სადეპუტატო უფლებამოსილება, რადგან ეს არ გამოგივიდათ, ახლა სხვა ხერხებით ცდილობთ შემიწყვიტოთ იმუნიტეტი. თქვენ ვერ შემაშინებთ შანტაჟით და სხვა ბინძური მეთოდებით. მე არაფერში მჭირდება თქვენი იმუნიტეტი, ჩემი იმუნიტეტი პატიოსნება, სამშობლოს ერთგულება და წესიერი ხალხის სიყვარულია. საქართველოს პროკურატურა თქვენს ხელში კრიმინალური დაწესებულება გახდა, ის კრიმინალური მენტალიტეტის ადამიანებით გაივსო, რომელსაც რეალურად სათავეში ყაჩაღი ფარცხალაძე უდგას,“ - განაცხადა როლანდ ახალაიამ.

შეგახსენებთ, პროკურატურამ პარლამენტს როლანდ ახალაისთვის იმუნიტეტის მოხსნის წინადადებით მიმართა. ახალაიას უფლებამოსილების გადამეტებაში ადანაშაულებენ.