2014-04-01 11:06

ისტორიის მეცნიერებათა დოქტორი იური ფელშტინსკი ანალიტიკურ სტატიას აქვეყნებს, სადაც აცხადებს, რომ რუსეთის მოქალაქეებს რცხვენოდათ, პუტინისთვის დაერქვათ ჰიტლერი, მაგრამ დადგა დრო, როცა ყველაფერს თავისი სახელი უნდა ეწოდოს.

ფელშტინსკი ასევე წერს, 90-იან წლებში მოსკოვში სახლების აფეთქების ორგანიზებიდა და ჯერ ჩეჩნეთში, მერე კი საქართველოში ომის მიუხედავად, პუტინმა საბოლოო უარი ევროპულ საზოგადოებაზე მხოლოდ 2014 წლის მარტში გადადგმული ნაბიჯების შემდეგ თქვა.

ფელშტინსკი პარალელს ავლებს ჰიტლერსა და პუტინს შორის და წერს, რომ 2014 წლის მარტში პუტინმა რუბიკონი გადალახა. მისი თქმით, ჰიტლერიც კი რამდენიმე სახელმწიფოს ბლოკს ემყარებოდა და რუსეთი კი სრულიად იზოლირებული აღმოჩნდა, ამიტომაც, რუსეთს არ შეუძლია ომი აწარმოოს სრულიად კაცობრიობის წინააღმდეგ.

„ახლა მსოფლიო, კაცობრიობა დგას არჩევანის წინაშე: იომოს თუ არა პუტინთან, რომელიც რუსეთის იმპერიის აღდგენაზე ოცნებობს. ამ ომის შედეგი რუსეთი დაშლა იქნება და ეს დაშლა ისეთი ხმაურიანი და გამანადგურებელი გამოვა, რომ 1991 წელს სსრ კავშირის დაშლა მასთან შედარებით, მოკრძალებულ რეპეტიციად გამოჩნდება სპექტაკლის წინ“, - წერს ისტორიკოსი.

„ვფიქრობ, პუტინის ნიურნბერგის პროცესი სევასტოპოლში გაიმართება. და ყველა ბრალდებული, იმათ გარდა, ვინც სიცოცხლეს თვითმკვლელობით დაამთავრებენ, მივლენ იმ დღემდე, როცა მათ განაჩენს გამოუცხადებენ. მე მინდა, რომ ეს მსჯავრდებულები იყვნენ:

საგარეო საქმეთა მინისტრი სერგეი ლავროვი, რომელიც დღეს პუტინისთვის რიბენტროპის როლს ასრულებს, თავდაცვის მინისტრი სერგეი შოიგუ, ვიჩაესლავ სურკოვი, „უკრაინის დაპყრობის“ გეგმის პოლიტიკური და იდეოლოგიური ავტორი, ნიკოლოზ პატრუშევი - ფსბ-ს ყოფილი და ახლანდელი უშიშროების საბჭოს თავმჯდომარე, რუსი ფაშისტი დიმიტრი როგოზინი, შუასაუკუნეების ნაციონალისტი ალექსანდრე პროხანოვი და რუსეთის ტელევიზიაში თავისუფალი სიტყვის ჩამხშობი კონსტანტინე ერნსტი.

ასევე ისინი, ვინც დიდი ხანია, კადრს მიღმა ემსახურებიან პუტინს: კგბ-ს გენერლები სერგეი და ვიქტორ ივანოვები და იგორ სეჩინი. მინდა მათ შორის იყვნენ რუსეთის პარლამენტისა და ფედერაციის საბჭოს ყველა წევრი, რომლებმაც თავდაპირველად უკრაინაში ჯარების შეყვანას, შემდეგ კი ყირიმის ანექსიას მისცეს თანხმობა“, - აღნიშნულია ცნობილი ისტორიკოსის იური ფელშტინსკის სტატიაში.