2014-03-31 23:49

კიევის ცენტრში, კრეშატნიკის ქუჩაზე ინციდენტი მოხდა, რა დროსაც ცეცხლსასროლი იარაღი გამოიყენეს. სროლის შედეგად დაიჭრა ორი პირი, რომელთაგან ერთი კიევის მერიის თანამშრომელი, ერთი კი მაიდნის თავდაცვითი რაზმის წევრია.

დაჭრილების სიცოცხლეს საფრთხე არ ემუქრება, ხოლო თავდამსხმელი, ბოლო ინფორმაციით, უკვე ჩაბარდა მილიციას. ის „მემარჯვენე სექტორის“ წარმომადგენელი, მეტსახელად „ირანელი“ აღმოჩნდა. ინციდენტი რესტორან მაფიასთან მოხდა და „ირანელმა“ საბრძოლო ცეცხლსასროლი იარაღი გამოიყენა.

როგორც „მემარჯვენე სექტორის“ წარმომადგენლები აცხადებენ, ინციდენტი საყოფაცხოვრებო ნიადაგზე მოხდა და მაიდანზე კარვებისა და ბარიკადების განლაგებასთან დაკავშირებული კამათიდან დაიწყო. მათივე თქმით, ამ დროისთვის ინციდენტი ამოწურულია, თუმცა, ცნობილი ხდება, რომ „მემარჯვენე სექტორის“ წარმომადგენლებმა თავდამსხმელი სასტუმრო „დნეპრში“ შეიფარეს და თავდაპირველად მის გადაცემაზე უარს აცხადებდნენ.

ამ წუთებში სასტუმრო ალყაშია, ხოლო შინაგან საქმეთა მინისტრი აცხადებს, რომ იქ მყოფ შეიარაღებულებს იარაღის დაყრისა და დანებების წინადედადებით მიმართეს:

„დაკავებულია „მემარჯვენე სექტორის“ წევრი ვინმე ანდრეი კოზიუბჩიკი, მისი დაკითხვა დაიწყო. სასტუმრო „დნეპრი“ ალყაშია. ვღებულობთ ყველა ზომას, რომ შემთხვევითი მსხვერპლი თავიდან ავირიდოთ. ყველას, ვინც უკანონო იარაღით იმყოფება შენობაში, დანებება შევთავაზეთ“, - ამბობს არსენ ავაკოვი.