2014-03-31 22:20

ყირიმში დიმიტრი მედვედევის ვიზიტს ოფიციალური კიევი აპროტესტებს. უკრაინის საგარეო საქმეთა სამინისტროს განცხადებით ხელისუფლების თანხმობის გარეშე ნებისმიერი უცხოელი ლიდერის ჩასვლა საერთაშორისო შეთანხმების დარღვევად ითვლება.

რუსეთის პრემიერმინისტრი ანექსიის შემდეგ ყირიმში პირველად ჩავიდა და მთავრობის სხდომა ჩაატარა. პარალელურად, რუსეთი ირწმუნება, რომ მოსაზღვრე რეგიონებიდან სამხედრო კონტიგენტის შემცირება დაიწყო, რასაც კიევში უბრალოდ როტაციას უკავშირებენ.

„პუტინს, მედვედევსა და ლავროვს შეუძლიათ ნებისმიერი პროექტის ინიციატივით გამოვიდნენ რუსეთის ფედერაციისთვის. უკეთესი იქნება, უკრაინის ნაცვლად რუსეთის ლიდერებმა საკუთარი ქვეყნის პრობლემებს მიხედონ. უკრაინას ჰყავს საკუთარი მთავრობა, პარლამენტი და მოსახლეობა, რომელიც საკუთარ მომავალს თავად განსაზღვრავს“, - განაცხადა უკრაინის პრეზიდენტის მოვალეობის შემსრულებელმა ალექსანდრე ტურჩინოვმა.