არასამთავრობო ორგანიზაცია „დედამიწა ჩვენი სახლია“ 27 მარტს თბილისში გამართავს აქციას რუსეთის იმ 11 მოქალაქის მხარდასაჭერად, რომლებსაც აშშ-მა სანქციები დაუწესა.
აქცია პუშკინის სახელობის სკვერში, თავისუფლების მოედანთან გაიმართება. „აქცია რუსეთის დროშების, ასევე, აშშ-ის მხრიდან ადამიანთა უფლებების დარღვევის ამსახველი ფოტოპლაკატების ფონზე ჩაივლის“, - უთხრა ორგანიზაციის თავმჯდომარემ ელგუჯა ხოდელმა გამოცემას „ჯორჯია ონლაინ“.
მისი თქმით, ორგანიზაცია მხარს უჭერს რუსეთის შემადგენლობაში ყირიმის დაბრუნებას და ამ ფაქტს ისტორიული სამართლიანობის აღდგენად მიიჩნევს. „რაც შეეხება უკრაინას, იქ აშშ-ის მხარდაჭერით ხელისუფლებაში მოვიდნენ ნეოფაშისტები და ჩვენ ამას ვგმობთ.
ხოლო იმ შემთხვევაში, თუკი რუსეთის 11 მოქალაქეს არ მოეხსნება აშშ-ის მიერ დაწესებული სანქციები, ჩვენი ორგანიზაციის 11 მოქალაქე მოითხოვს ჩვენ, საქართველოს 11 მოქალაქესაც დაგვეკისროს სანქციები. ჩვენი სია ასეთია: ელგუჯა ხოდელი, არჩილ ლორია, ამირან კაპანაძე, დათო ალადაშვილი, გიორგი ჭიჭიაშვილი, მამუკა ზანდუკელი, გიორგი შავიძე, მანუჩარ ციციაშვილი, დავით დოლიძე, ირაკლი თარგამაძე, შოთა ცერცვაძე. მართალია, უცხოეთში ანგარიშები არ გვაქვს, მაგრამ აშშ-ს შეუძლია, ჩვენ არ მოგვცეს ვიზა“, - ამბობს ხოდელი.
