ქუთაისში, ანჯაფარიძის ქუჩაზე 88 წლის მოხუცი მამაკაცი საკუთარ სახლში ჯერ აწამეს, შემდეგ კი გაძარცვეს, - ამის შესახებ „ნიუპრესი“ იტყობინება.
დაზარალებული 88 წლის, სოციალურად დაუცველი გოგი გრძელიძეა, რომელმაც ძარცვის შემდეგ დასახმარებლად მეზობლებს მიმართა.
მეზობლების თქმით, მძარცველმა სოციალურად დაუცველის ჭიშკარი გატეხა, დაზარალებული რკინის ბლაგვი იარაღით სასტიკად სცემა და მიიმალა.
„მოხუცი სასტიკად ნაწამები და დასისხლიანებული იყო. მოხუცის ნათქვამით, მან თავი მოაჩვენა, თითქოს, მკვდარი იყო და ამის შემდეგ მძარცველმა გრძელიძის ქათმები მოიპარა. ეს მოხუცმა თავისი თვალით დაინახა,"- ამბობს დაზარალებულის მეზობელი ირინა ფეტისოვა „ნიუპრესთან“ საუბარში.
"დანაშაულის ჩამდენი პირი მალევე დააკავეს, მაგრამ პროკურატურის შუამდგომლობის საფუძველზე, ხელწერილის დაწერის შემდეგ გაათავისუფლეს. ამ ეტაპზე მიმდინარეობს ექსპერტიზა, რომლის დასრულების შემდეგ მოხდება დაკავება. ეჭვმიტანილი თანამშრომლობს გამოძიებასთან. მას სისხლის სამართლის კოდექსის 178-ე მუხლით გაასამართლებენ" - განუცხადეს newpress.ge-ს შსს პრესსამსახურში.
