2014-03-25 17:01

"ნაციონალური მოძრაობის" ერთერთი ლიდერი გივი თარგამაძე აცხადებს, რომ საქართველოში კრიმინალური მდგომარეობა კატასტროფულად გაუარესდა და ამაში ბიძინა ივანიშვილს ადანაშაულებს.

განცხადება თარგამაძემ საგანგებო ბრიფინგზე გააკეთა:

"ორ თვეში 17 მკვლელობა იყო დაფიქსირებული. რომ ავიღოთ ბოლო ერთი დღე, სამი მკვლელობა გვაქვს სახეზე. როდესაც ერთი დღის განმავლობაში ასეთი სავალალო სურათია, პრაქტიკულად შეიძლება წარმოვიდგინოთ, რომ მომავალი თვის სტატისტიკა როგორი იქნება. ეს არის რეალური სტატისტიკა. ხოლო ის სტატისტიკური მონაცემები, რომელსაც შინაგან საქმეთა სამინისტრო წარმოადგენს, შეუძლიათ კაბინეტებში გაიკრან.

ამასთან დაკავშირებით პირადი პასუხისმგებლობა არის ბიძინა ივანიშვილზე, როგორც რეალურ მმართველზე. ეს მისი სრულიად უპასუხიმგებლო ორი განცხადებიდან გამომდინარეობს - ერთი, როდესაც მან განაცხადა, რომ საზოგადოება გაგებით უნდა მოეკიდოს ასეთ შემთხვევებს, კრიმინალის გაზრდას და მეორე, როდესაც მან აღნიშნა, რომ ნათესაური პრინციპით სხვადასხვა სტრუქტურების დაკომპლექტება მისაღებია.

სწორედ ასე დაკომპლექტდა შინაგან საქმეთა სამინისტრო. მთელი ამ სიტუაციის განმსაზღვრელი არის ის, რომ ქვეყნის არალეგიტიმური მართვა მიმდინარეობს არასათანადო პირების მიერ. ფაქტობრივი მმართველი არის თავად ბიძინა ივანიშვილი.

ბიზნესს და მთელ ამ მიმართულებებს მართავს მისი დეიდაშვილი, ხოლო პოლიტიკურ პროცესებს მართავს თამაზაშვილის დისშვილი, რომელიც არის ფაქტიური მინისტრი შს უწყების. ის არის გენერალური ინსპექციის უფროსი, მისი ინტერესი გამოიხატება ბიზნესების გადაქაჩვაში, მოწმეების გატაცებაში, ზეწოლაში და სიტუაციას მართავს ზვიად ჯანყარაშვილი", - ამბობს გივი თარგამაძე.