„ევრაზიის კავშირის“ სახელით გამართულ ნატოს საწინააღმდეგო ჩვენებაზე ალეკო კვახაძე შეიპარა, განგებ გააკეთა პრორუსული განცხადებები, შემდეგ კი საქართველოში შემოჭრილი, მოკლული რუსი ოკუპანტების ხსოვნისთვის პატივის მიგება ითხოვა, რაც ნახევარმა დარბაზმა შეასრულა.
“მე გავაკეთე პრორუსული განცხადებები, შემდეგ კი ვთხოვე ფეხზე წამოდგომით მიგვეგო პატივი ოკუპანტებისთვის, რომლებიც საქართველოს თავს დაესხნენ და ამ განცხადების შემდეგ დამსწრეთა ნახევარზე მეტი ფეხზე წამოდგა,”- ამბობს კინოს სახლთან მიმდინარე აქციების მონაწილე ალეკო კვახაძე.
კვახაძე ჰყვება , რომ ის კინოს სახლში ,,ევრაზიული კავშირის“ ინიციატივით გამართული ფილმის ჩვენებაზე შეიპარა, რათა ისინი საქართველოს ღალატში ემხილებინა.
,,ამის შემდეგ მე მათ ვუთხარი, რომ ისინი არიან საქართველოს მოღალატეები და ადრე თუ გვიან საქართველოს სათავეში კვლავ მოვლენ პატრიოტები, რომლებიც საქართველოს მათნაირი ნაგვებისგან გაათავისუფლებენ“, - განაცხადა კვახაძემ.
შეგახსენებთ, რომ კინოს სახლში იუგოსლავიის დაბომბვისა და შემდგომი პერიოდის ამსახველი ვითარების შესახებ 30-წუთიანი დოკუმენტური ფილმის ჩვენება მიმდინარეობდა.
ამ შეკრებას კინოს სახლის გარეთ საზოგადოების ნაწილი აპროტესტებდა. პარალელური აქციების დროს პროტესტი ფიზიკურ დაპირისპირებაში გადაიზარდა, დაკავებულები არიან აქციის მონაწილეები, დაკავებულთა შორის ერთი, ფარნაოზ ჭკადუა, ,,თავისუფალი ზონის" წევრია.
