2014-03-24 13:35

გუშინ, ღამის საათებში ვარკეთილში შეიარაღებულმა პირებმა, რომლებსაც სპეცრაზმელების ფორმა ეცვათ, ტაქსის მძღოლი დააყაჩაღეს და სასტიკად სცემეს.

დაზარალებულმა გივი კოპტონაშვილმა, რომელიც ცემის შემდეგ ადგილზე მიატოვეს, პოლიციას განცხადებით მიმართა. მისი თქმით, თავდამსხმელები სამნი იყვნენ და სპეცრაზმის, შავი ფორმები ეცვათ. რომელი ძალოვანი სტრუქტურის ან ქვედანაყოფის წევრები იყვნენ თავდამსხმელები, დაზარალებული ვერ ასახელებს.

შსს-ს პრესსამსახურში ადასტურებენ, რომ აღნიშნულ ფაქტზე სისხლის სამართლის საქმე აღიძრა:

"საქმე აღძრულია ჯგუფური ყაჩაღობის მუხლით, გამოძიებას პროკურატურა აწარმოებს სისხლის სამართლის კოდექსის 238-ე მუხლით და თუ დადასტურდა აღნიშნული დანაშაული, დამნაშავეები მთელი სიმკაცრით დაისჯებიან", - უთხრეს "აფხაზეთის ხმას" შსს-ს პრესცენტრში.

შენიშვნა: ფოტო არ ასახავს ნიუსში აღწერილ ფაქტს და მას ერთვის თემატური კავშირის პრინციპით