2014-03-20 16:27

საქართველოს ყოფილი მთავარი პროკურორის, მურთაზ ზოდელავას განცხადებით, საქართველოს ყოფილ ხელისუფლებას ზურაბ ჟვანიას გარდაცვალების საქმის გამოძიებისთვის ხელისშემშლელი მტკიცებულებები არ ჰქონია, შესაბამისად მისივე განცხადებით, ეს მტკიცებულებები გარდაცვალების ოფიციალურ ვერსიას ეჭვქვეშ ვერ დააყენებდა:

„ყველაზე დიდი აბსურდი, რომელიც ამ ისტორიაში შეიძლება იყოს, არის ის, თითქოს ჩვენს გამოძიებას ჰქონდა ისეთი მტკიცებულებები, რომლებიც კითხვის ნიშნის ქვეშ აყენებდა გამოძიების ოფიციალურ ვერსიას, მაგრამ ეს მტკიცებულებები რატომღაც ჩავდეთ საქმეში და დატოვებულია პროკურატურაში. სრული პასუხისმგებლობით ვაცხადებ, რომ საქმის ის ნაწილი, რომელიც იყო დაცული განსაკუთრებულ რეჟიმში, შეიცავდა განსაკუთრებით სათუთ ინფორმაციას და ამიტომ ინახებოდა სეიფში.

თუ არსებობდა მტკიცებულებები, რომლებიც გამოძიების ვერსიას ეჭვქვეშ დააყენებდა, მე ჩავდებდი მას სისხლის სამართლის საქმეში და დავუტოვებდი არჩილ კბილაშვილს? თქვენ როგორ ფიქრობთ?

ჟვანიას საქმის გამოძიება დასრულდა დიდი ხნით ადრე ჩემს პროკურორად დანიშვნამდე. საქმეში იყო გარკვეული დეტალები, გარკვეული დელიკატური მომენტები, რის გამოც სისხლის სამართლის საქმის ეს ნაწილი ინახებოდა არა მურთაზ ზოდელავას კაბინეტში, არამედ მთავარ პროკურატურაში ყველაზე დაცულ ადგილას – მთავარი პროკურორის კაბინეტში, სეიფში. ეს, რა თქმა უნდა, იყო სისხლის სამართლის საქმის ნაწილი, მოიცავდა ფოტო და ვიდეომასალას არა ამარტო შემთხვევის ადგილის, არამედ შემდგომ, სამედიცინო ექსპერტიზის შესახებ. საქმე იმაშია, რომ ეს არის კონფიდენციალური ინფორმაცია, ვინაიდან იქ იყო განსაკუთრებულად სათუთი საკითხები და სწორედ იმიტომ, რომ ამ ინფორმაციას არ გაეჟონა, ინახებოდა განსაკუთრებით დაცულ ადგილას“, - განაცხადა ზოდელავამ.