2014-03-19 20:19

„საქართველოს რკინიგზის“ ყოფილი ხელმძღვანელი ირაკლი ეზუგბაია ბიძინა ივანიშვილის მიერ უჩა მამაცაშვილის შესახებ გამოთქმულ მოსაზრებებს ეხმიანება და წერს, რომ „საქართველოს რკინიგზა“, წინსვლის ნაცვლად, უკან მიიწევს, რაც მისთვის სამწუხაროა.

„დაშვებები:

- კეზერაშვილი ჩათული იყო თხევადი ტვირთის გადაზიდვაში, რაც ცუდია;
- „საყვარელი დეიდაშვილი“ ჩართულია თხევადი ტვირთის გადაზიდვაში, რაც კარგია;

დასკვნა: ცუდია, როცა არ ხარ „საყვარელი დეიდაშვილი“. 

საზოგადოდ გასაგები რომ იყოს, საქმე ეხება გადამზიდავ კომპანიას „ჯორჯიან ტრანზიტი“, რომელიც „საქართველოს რკინიგზის“  სატარიფო პოლიტიკის მიხედვით სარგებლობდა სატარიფო შეღავათით წელიწადში 4მლნ ტონა და მეტი გადაზიდვისას 2004-2012 წწ, ჯამურად წელიწადში დაახლოებით 10მლნ ტონა ტვირთის გადაზიდვის პირობებში. 2011 წლის ჩათვლით, ამ კომპანიის გადაზიდვების ანაზღაურება ხდებოდა ბანკში „ქართუ“  არსებული ანგარიშებიდან. ეს კომპანია შეიძინა „საქართველოს რკინიგზამ“ 2013 წელს. 

ამასთან, 2012 წლამდე „საქართველოს რკინიგზის“ მიერ დაკარგულ შემოსავლებზე საუბარი უადგილოა, რადგან მონოპოლისტი კომპანია თავად ადგენს ფასწარმოქმნას. მას შეუძლია გაზარდოს გადაზიდვის ტარიფი ყველა გადამზიდავისთვის უკლებლივ, მათ შორის თხევად ტვირთზე, მათ შორის შეცვალოს ან გაანულოს შეღავათი, ისე როგორც ამას აკეთებდა 2005-2012 წწ განმავლობაში.

ასევე, მას შეუძლია გააუქმოს კონტრაქტი. ბუნებრივია, ეს უნდა გააკეთოს ისე, რომ თავად გაიზარდოს, მაგრამ ამასთან იყოს კონკურენტული გადაზიდვების ბაზარზე (ალტერნატიულ სატრანზიტო მიმართულებებთან შედარებით). 

ამის ნაცვლად, „საქართველოს რკინიგზამ“ შეიძინა კომპანია „ჯორჯიან ტრანზიტი“ 2013 წელს, და, როგორც ირკვევა, მის კურატორად დანიშნა კერძო პირი - „საყვარელი დეიდაშვილი“. საინტერესო გამოსავალია. 

მიმდინარე შედეგები ასეთია: 2013 წელს ჯამური გადაზიდვები შემცირდა 10 პროცენტით, მათ შორის თხევადი ტვირთი. Fitch Ratings მიხედვით ეს მოცულობა წელიწადში 2-3 მხოლოდ პროცენტით გაიზრდება მომავალში. აქ ტერმინი „ტრანზიტში პრობლემებია“ ძალიან მარტივად ჟღერს. 

თუმცა, დისკუსიაში შესვლა ძნელია, რადგან „საქართველოს რკინიგზა“ რთული ორგანიზაციაა და ჯერ კიდევ არ არის კარგად გააზრებული ახალი მმართველობის პირობებში: 
- ტვირთი შემცირებულია - არ ჩანს 5 მლნ ტონა თხევადი ტვირთი, რომლის დეკლარირებაც შარშან მოხდა; 
- გაჩერებულია, ან ძალიან ნელი ტემპით მიმდინარეობს მოდერნიზაციის პროექტი;
- შემცირებულია ბიუჯეტში დივიდენდების გადახდა;
- ანაკლიაში პორტის პროექტი გაჩერებულია, ხოლო ალტერნატიული პროექტი მხოლოდ ნახატია ფურცელზე და შესწავლა რეალურად ეხლა მიმდინარეობს; 
- ხელოვნური ბარიერებია თბილისის შემოვლითი გზის პროექტზე.

დამატებით, „საქართველოს რკინიგზა“ საკრედიტო რეიტინგის შემცირების რისკის ქვეშ არის, რაც მას კაპიტალის ღირებულებას გაუზრდის და წვდომას საერთაშორისო კაპიტალის ბაზრებისადმი შეუზღუდავს. ასეთი დისკუსიები, ვეჭვობ, რეიტინგზე კარგად მოქმედებდეს. 

ერთი სიტყვით, "საქართველოს რკინიგზა" ამაყად მიიწევს წინ - უკან...ში!

სამწუხაროა, ძალიან სამწუხარო!“, - წერს ირაკლი ეზუგბაია.