2020-04-14 11:08

კანადის ლავალის უნივერსიტეტის მეცნიერი, გიორგი ბაბუაძე, რომელიც კანადაში კორონავირუსის ვაქცინის შექმნაზე მუშაობს, სოციალურ ქსელში განმარტავს, თუ რატომ უვითარდებათ ბავშვებს ვირუსი უფრო მსუბუქ ფორმებში.

"იმუნოლოგიაში არსებობს ფენომენი, რომელსაც ციტოკინური შტორმი ეწოდება (ციტოკინები კონკრეტული იმუნური უჯრედების მიერ წარმოებული მოკლე ზომის პეპტიდები, რომლებიც ასევე ებრძვიან უცხო ანტიგენს). გარკვეული მიზეზების გამო, ხშირად არის შემთხვევები, როდესაც ჩვენი ორგანიზმი მთლიანი ძალებით ცდილობს, შეუტიოს ანტიგენს და სწორედ ამ დროს შესაძლებელია განვითარდეს ციტოკინური შტორმი. სწორედ ეს ფენომენი იყო ე.წ კორონა SARS-1 (2003) და ღორის გრიპის (2009) პანდემიებისას სიკვდილიანობის ერთ-ერთი მთავარი მიზეზი.
კავშირი:
ბავშვებს არ აქვთ ჩამოყალიბებული იმუნური სისტემა და ცნობილია, რომ მათი იმუნური უჯრედები გაცილებით ნაკლები რაოდენობის ციტოკინებს გამოიმუშავებენ, ვიდრე ზრდასრული ადამიანების იმუნური სისტემა," - წერს გიორგი ბაბუაძე სოციალურ ქსელში.