2020-04-14 10:57

თურქეთის პარლამენტმა კანონი მიიღო, რომელიც კორონავირუსის გავრცელების გამო ციხეებიდან დაახლოებით 45 000 პატიმრის დროებით გათავისუფლებას ითვალისწინებს, - ამის შესახებ ინფორმაციას „როიტერსი“ ავრცელებს.

გამოცემის ცნობით, კანონი დაახლოებით ამავე რაოდენობის პატიმრების მუდმივ გათავისუფლებასაც ითვალისწინებს, რისი მიზანიც გადავსებულ ციხეებში პატიმრების რაოდენობის შემცირებაა.

კანონს მხარი 279 დეპუტატმა დაუჭირა, ხოლო 51 კი წინააღმდეგ წავიდა.

კანონის ინიცირება მმართველმა პარტიამ მოახდინა. კანონის თანახმად, ციხეებიდან პატიმრებს მაისის ბოლომდე გაათავისუფლებენ. ხოლო, საჭიროების შემთხვევაში, იუსტიციის სამინისტროს ამ ვადის ორჯერ - არაუმეტეს 2-2 თვით გახანგრძლივების შესაძლებლობა ექნება.

ოპოზიცია აღნიშნულ კანონს აკრიტიკებს და აცხადებს, რომ გათავისუფლებულებს შორის ტერორიზმის ბრალდებით დაპატიმრებული ათასობით პირი იქნება.

ბოლო მონაცემებით, თურქეთში კორონავირუსით ინფიცირების 56 000 შემთხვევა დაფიქსირდა, ხოლო 1 198 ადამიანი კი დაიღუპა. რაც შეეხება ციხეებს, დღემდე კორონავირუსი 17 პატიმარსა და ციხის 79 თანამშრომელს დაუდასტურდა. დაღუპულია 3 პატიმარი.