2019-07-02 17:31

კრემლში ისევ აღშფოთებულები არიან და იმუქრებიან - ჟენევის მოლაპარაკებების დაწყებამდე ერთი დღით ადრე, რუსეთის საგარეო საქმეთა მინისტრის მოადგილემ, გრიგორი კარასინმა საქართველოში მიმდინარე მოვლენები შეაფასა.

გამოცემა „კომერსანტთან“ ინტერვიუში კარასინმა განაცხადა, რომ ახალმა ატმოსფერომ რუსეთსა და საქართველოს შორის, უკვე დაიწყო ხალხების სასარგებლოდ მუშაობა, მაგრამ აღმოჩნდა, რომ ეს ყველაფერი არასტაბილურია და შესაძლებელია, “ხალხის მასის მიერ“ დაფიქრების გარეშე იყოს გაუქმებული, საქართველოს მაღალი თანამდებობის პირების უხეში და უპასუხისმგებლო განცხადებების ფონზე.

„როგორც ჩანს, საქართველოში დაავიწყდათ, რომ რუსეთს პატივსა და ღირსებაზე საკუთარი წარმოდგენა აქვს. ჩვენს ტრადიციებში არ შედის ჩვენი ხალხის მისამართით თავხედობისა და მუქარების მოთმენა,”- განაცხადა კარასინმა.

მისი თქმით, სიტუაცია მტრობისა და კონფრონტაციის ჩიხში „ერთიან ნაციონალურ მოძრაობასთან“ დაახლოებულმა რადიკალებმა შეიყვანეს. მან საქართველოსთან ავიამიმოსვლის დაბლოკვას ხისტი, თუმცა ადეკვატური ზომა უწოდა.
რუსი დიპლომატის მტკიცებით, მოსკოვში საქართველოსთან სავიზო რეჟიმის გაუქმების განხილვა მიმდინარეობდა, თუმცა ბოლო დროის მოვლენების გამო ეს საკითხი გადაიდო.