საქართველოს მესამე პრეზიდენტმა მიხეილ სააკაშვილმა „არჩევანში“ განაცხადა, რომ ამ ეტაპზე აშშ-იდან უკრაინაში საცხოვრებლად გადასვლას არ აპირებს.
„მე მქონდა ძალიან ბევრი ფაქტორი იმისთვის, მიმეღო გადაწყვეტილება, დროებით წავსულიყავი საქართველოდან აშშ-ში. ვერ გავხდებოდი პენსიონერი და ვენახის გასხვლით ვერ დავიკავებდი თავს, ამიტომაც წავედი, მაგრამ ეს არ ნიშნავს, რომ მე რომელიმე სხვა ქვეყანას მივუძღვნი თავს, იმის მიუხედავად, რომ ძალიან მიყვარს უკრაინა.
მე ვარ ის ქართველი პოლიტიკოსი, რომელმაც, განსხვავებით სხვა პოლიტიკოსებისგან, მთელი ცხოვრება ააგო საქართველოზე. მე დღეს უკრაინულად ბევრად უფრო თავისუფლად ვლაპარაკობ, ვიდრე რუსულს, რადგან რუსული ცოტა დამავიწყდა, მაგრამ მთავარი ისაა, რომ მე არ დავრჩები არცერთ სხვა ქვეყანაში სამუდამოდ.
უკრაინელები ძალიან მაგარი ხალხია და მათგან ბევრი რამ უნდა ვისწავლოთ ისევე, როგორც ისინი სწავლობდნენ ჩვენგან. ახლა ჩვენი ჯერია ვისწავლოთ მათგან და ერთად წავიდეთ თავისუფალი საქართველოს გამარჯვებისკენ“, - აღნიშნა კიევიდან ჩართვის დროს „რუსთავი-2“-ის ეთერში მიხეილ სააკაშვილმა.
