2016-09-18 23:14

ერთიანი ნაციონალური მოძრაობის მიერ წალენჯიხა-ჩხოროწყუს ოლქში მაჟორიტარი დეპუტატობის კანდიდატის ლევან ქარდავას წინასაარჩევნო ბილბორდი მოიპარეს, რომელიც ქალაქ ჯვარში, ერთერთი მოსახლის ავტოფარეხზე, მისივე თანხმობით იყო დამაგრებული. ინფორმაციას "თაიმერი" ავრცელებს.

ლევან ქარდავას ბილბორდი, რომელიც დაახლოებით ოთხი მეტრის სიგანისა და ერთი მეტრი სიმაღლის იყო, სავარაუდოდ, დღისით მოიპარეს. შემთხვევას თვითმხილველები არ ჰყავს. ქურდობის ადგილზე არც ქუჩის სათვალთვალო კამერებია დამაგრებული. ბილბორდი ავტოფარეხის წინა, ქუჩის მხარის ფასადზე იყო გაკრული. ის იქ ხუთშაბათს დაამონტაჟეს.

აღსანიშნავია, რომ ადგილობრივთა განცხადებით, ჯვარში კიდევ ერთი კურიოზული შემთხვევა მოხდა: ქალაქის ცენტრში განთავსებული პაატა ბურჭულაძის პარტიის ოფისიდან "სახელმწიფო ხალხისთვის" გაერთიანების დროშა მოიპარეს, რომელიც მოგვიანებით, გამვლელმა ოფისის გვერდითა ქუჩაზე, ასფალტზე დაგდებული იპოვა.