"ქართულმა ოცნებამ" თბილისის საარჩევნო ოლქების მაჟორიტარი კანდიდატები წარადგინა. მაჟორიტარობის კანდიდატთა შორისაა ბიზნესმენი ბექა ოდიშარიაც, რომელიც 2012 წელს "ერთიანი ნაციონალური მოძრაობის" შემომწირველთა შორის იყო. ის კრწანისის მე-7 ოლქში იყრის კენჭს.
ბექა ოდიშარია კომპანია “ჯინდალ პეტროლიუმის” გენერალური დირექტორი და ლატვიის საპატიო კონსული იყო. 13 ივლისს, როცა მისი შესაძლო წარდგენის შესახებ ცნობა გავრცელდა, ის ამ ინფორმაციას არ ადასტურებდა:
„ჯერჯერობით განვაგრძობ ჩემი კომპანიის გენერალური დირექტორის და ლატვიის საპატიო კონსულის რანგში მოღვაწეობას. ამჟამად ვერანაირ ინფორმაციას ვერ დაგიდასტურებთ. ამისათვის მზად თუ ვიქნები, სიამოვნებით გამოვალ კომუნიკაციაზე“, - განაცხადა მაშინ ბექა ოდიშარიამ.