-
2016-07-02 13:18
საპარლამენტო უმრავლესობის წევრი "ქართული ოცნებიდან" ზვიად კვაჭანტირაძე მიიჩნევს, რომ სტამბოლის აეროპორტში მომხდარ ტერაქტთან ახმედ ჩატაევის დაკავშირება "რუსთავი-2"-ის მიერაა ტირაჟირებული. შეგახსენებთ, ტერაქტის ორგანიზატორობაზე ჩატაევის შესაძლო კავშირზე თურქული მედია წერდა, ასევე, ჩატაევი დაასახელეს შესაძლო ორგანიზატორად აშშ-შიც.
“მე საერთოდ არ მჯერა, რომ ეს ის ჩატაევია. ეს “რუსთავი2“-ის მიერაა ტირაჟირებული. ეს არის პიარ-კამპანიის ნაწილი, რომელსაც გარკვეული პოლიტიკური ძალების შეკვეთით, ესა თუ ის საინფორმაცია საშუალება ახორციელებს. არ მჯერა, რომ ეს არის ის ჩატაევი. ამ საქმეში ყველაზე დიდი და მნიშვნელოვანი არის ის, რომ მოხდა ტერორისტული აქტი, რომელსაც ნაციონალობა არ გააჩნია და რომლის მიმართაც ყველანი შეუწყალებლები უნდა ვიყოთ. თუკი ვინმე ეცდება სტამბოლის ტერაქტებში საქართველოსა და “ქართული ოცნების“ ჩართვას, მომეცით საშუალება და იმდენ რამეს მოგიყვებით “ნაციონალური მოძრაობის“ პიონერობით ჩადენილ დანაშაულებზე, ამაზე სასაუბროდ დრო არ გეყოფათ“, - აღნიშნა ზვიად კვაჭანტირაძემ ჟურნალისტებთან თემის კომენტირებისას.
შეგახსენებთ, ახმედ ჩატაევი 2012 წელს, საქართველოს წინა ხელისუფლებამ ლაფანყურის ოპერაციის შედეგად დააკავა, 2012 წლის დეკემბერში კი, ხელისუფლების შეცვლის შემდეგ, ახალმა ხელისუფლებამ, პროკურატურის მოთხოვნით, პატიმრობა გირაოთი შეუცვალა, რის შემდეგაც ჩატაევმა საქართველო დატოვა და, წინასწარი ინფორმაციით, ტერორისტულ დაჯგუფებებს შეუერთდა.