31 წლის მამაკაცი, რომელსაც თბილისში, კანდელაკის ქუჩაზე, საკუთარ სახლთან უცნობმა პირებმა ესროლეს, საავადმყოფოში გარდაიცვალა. შემთხვევის შესახებ "რუსთავი-2"-ის ვებგვერდზე, "კურიერის" ჟურნალისტზე დაყრდნობით გამოქვეყნდა ინფორმაცია, ცოტა ხნის წინ კი ცნობილი გახდა, რომ მიხეილ ცხაკაიას გადარჩენა ექიმებმა ვერ მოახერხეს.
დაჭრილს ორი ტყვია თავში ჰქონდა მოხვედრილი. შემთხვევის თვითმხილველი მიხეილ ცხაკაიას დედა გახდა: მამაკაცი სახლში იმყოფებოდა, როდესაც დაუდგენელმა პირებმა დაუძახეს, სახლიდან გამოიყვანეს და სწორედ ამ დროს გაისმა სადარბაზოსთან სროლის ხმაც. მკვლელობის მოტივი დაუდგენელია, მეზობლები შეკვეთილ მკვლელობაზე საუბრობენ, თუმცა, ყველა ერთხმად აღნიშნავს, რომ მიხეილ ცხაკაიას პირადი მტრები არ ჰყავდა და არც საეჭვო პირებთან ან ჯგუფებთან ურთიერთობაში ყოფილა შემჩნეული.
ეს უბნის ამ მონაკვეთზე ბოლო დროს მომხდარი უკვე მეორე მკვლელობაა. კიდევ ერთი მამაკაცი, კვარაცხელია, ცოტა ხნის წინ ასევე საკუთარ კორპუსთან, ცეცხლსასროლი იარაღით მოკლეს.