2016-03-29 14:44

აშშ მიესალმება უკრაინის გენპროკურორის ვიქტორ შოკინის გადაყენებას და მიიჩნევს, რომ ეს ფაქტი წინგადადგმული ნაბიჯია უკრაინაში კორუფციის დამარცხების საქმეში. ამის შესახებ უკრაინაში აშშ-ის ელჩმა ჯეფ პაიეტმა განაცხადა. 

"მნიშვნელობა არა აქვს, რა სახის დახმარებას მიიღებს უკრაინა მეგობარი ქვეყნებისგან, არა აქვს მნიშვნელობა თანხას, რომელსაც მიიღებს ის: უკრაინას ეჭვი არ ეპარება კორუფციის დაძლევაში. ამიტომაც, რადის დღევანდელ ნაბიჯს, დისკრედიტირებული გენპროკურორის გადაყენებასთან დაკავშირებით, ჩვენ პოზიტიურ ნაბიჯად მივიჩნევთ", - განაცხადა ამერიკელმა დიპლომატმა.

ჯეფ პაიეტმა დაამატა, რომ აუცილებელია შეირჩეს ახალი გენპროკურორი, რომელიც იქნება დამოუკიდებელი პროფესიონალი, ექნება უკრაინის საზოგადოების მხარდაჭერა და ასევე, იქნება ევრომაიდანზე გაცხადებული პრინციპების ერთგული. 

შეგახსენებთ, უკრაინის რადამ ვიქტორ შოკინი გადააყენა. გადაწყვეტილებას მხარი 289 დეპუტატმა დაუჭირა. მანამდე თავად შოკინმა ბრძანებით, რომელიც მის კარიერაში ბოლო აღმოჩნდა, თანამდებობიდან მისი მოადგილე და ოდესის ოლქის პროკურორი დავით საყვარელიძე გადააყენა. ამასთან დაკავშირებით დავით საყვარელიძე საგანგებო განცხადების გაკეთებას თბილისის დროით 17:00 საათზე გეგმავს. 

ვიქტორ შოკინი რადის გადაწყვეტილებას გარეგნული სიმშვიდით შეხვდა: "ჩემთვის ეს მისაღები გადაწყვეტილებაა, ისედაც პენსიაზე გასვლას ვაპირებდი", - განუცხადა მან ჟურნალისტებს.