ცნობილი საოპერო მომღერალი, საქართველოს განვითარების ფონდის დამფუძნებელი პაატა ბურჭულაძე "კვირის პალიტრასთან" ინტერვიუში სხვადასხვა პოლიტიკურ საკითხს ეხება და ამბობს, რომ ფონდი პოლიტიკური ორგანიზაცია არ არის, მაგრამ საინტერესო გეგმაბი აქვს. "მე ქართველი ხალხის პროექტი ვარ", - ამბობს მომღერალი იმ ხმების საპასუხოდ, თითქოს ის "კრემლის პროექტია".
ამავე ინტერვიუში პაატა ბურჭულაძე საქართველო-რუსეთის ურთიერთობასაც ეხება და ამბობს, რომ 2008 წლის ომთან დაკავშირებით მისი მოსაზრებები ჟურნალისტებმა ადრე არასწორად გაავრცელეს:
"...რაც შეეხება ჩვენს შეცდომას 2008 წელს, არ მიგულისხმია ამაში ის, რომ რუსეთის აგრესიას პასუხი გავეცით. ჩვენი შეცდომა ისაა, რომ ჩვენი მთელი ისტორიის განმავლობაში ზედმეტად ვენდობოდით რუსულ პოლიტიკას, იგივე მოხდა 2008 წელსაც. ვფიქრობ, დღესაც იმავე შეცდომას ვუშვებთ. რუსეთის ზედმეტი ნდობა არ შეიძლება!
ჩვენ აღარ ვჩანვართ ევროპისა და აშშ-ის რადარებზე, უკვე აღარავინ ახსენებს საქართველოს. არ ვიცი, იქნებ ვიღაცისთვის ეს სწორი პოლიტიკაა და რუსეთს ამით ვაწყნარებთ, მაგრამ, ჩემი აზრით, ეს შეცდომაა.
რუსეთთან, ასეთ დიდ ქვეყანასთან, რა თქმა უნდა, არ უნდა გვქონდეს მტრული ურთიერთობა, მაგრამ არა ზედმეტი ნდობის ხარჯზე. ჩვენი ფონდის კურსი მხოლოდ დასავლურია, საქართველოს გზა ევროპის გზაა."
იმის შესახებ საუბრისას, თუ ვისი პროექტია, პაატა ბურჭულაძე ამბობს:
"ძალიან უნდათ "ნაციონალებს", რუსულ პროექტად გამომიყვანონ, "ქართულ ოცნებას" სურს "ნაციონალების" პროექტად მომნათლოს, მაგრამ ვაცხადებ - მე ვარ ქართველი ხალხის პროექტი. რაც შეება ფარულ ჩანაწერებს, რომელშიც სააკაშვილი ამბობდა, რომ ჩვენ უნდა ჩამოვყალიბდეთ "მესამე ძალად" - ჩვენ თუ ჩამოვყალიბდებით პოლიტიკურ ძალად, მესამე კი არა, აუცილებლად პირველი ძალა ვიქნებით. მეორე-მესამეზე სხვები განაწილდნენ..."
შეგახსენებთ, უფრო ადრე პაატა ბურჭულაძემ, საქართველოში აკრედიტირებულ ევროკავშირის ქვეყნების ელჩებთან შეხვედრის შემდეგ განაცხადა, რომ "რუსეთი, რა თქმა უნდა, ოკუპანტია".