2016-02-11 13:05

ექიმი ლევან ჩოლოყაშვილი ახალ პოლიტიკურ ცენტრ "გირჩს" შეუერთდა და ამასთან დაკავშირებით საკუთარ პოზიციას ასაჯაროებს. ცნობილია, რომ ლევან ჩოლოყაშვილი "გირჩის" საბურთალოს ოფისს უხელმძღვანელებს.

ლევან ჩოლოყაშვილი:

"გახლეჩილი საზოგადოებით და არაკეთილმოსურნე მეზობლის მიერ მართული პოლიტიკური ძალებით გულდაწყვეტილმა გადავწყვიტე, რომ შევუერთდე, ჯანსაღ და კვალიფიციურ ხალხს. 

მათი მამოძრავებელი ძალა არ არის აგრესია და პირადი გამორჩენა, აქვთ კონკრეტული, პროგრესული და არაილუზორული სამოქმედო გეგმა.

მჯერა, რომ თვითოეულ ჩვენგანს შეგვიძლია წვლილი შევიტანოთ ქვეყნის აღმშენებლობაში, სწორედ ამიტომ დავთანხმდი ჩემი მეგობრების ზურა ჯაფარიძის და გიორგი მელაძის შემოთავაზებას გავერთიანებულიყავი მათთან ბორდის წევრად.

ჩემი საექიმო საქმიანობიდან გამომდინარე მიჩვეული ვარ რეალობისთვის თვალის გასწორებას, სრული სიმძაფრით აღვიქვამ ქვეყანაში არსებულ პრობლემებს, მათთან გამკლავების ერთადერთ საშუალებად მივიჩნევ ჩვენი პოლიტიკური ორგანიზაციის პროფესიული და რაციონალური სამოქმედო გეგმის ცხოვრებაში გატარებას. ერთხელ და სამუდამოდ უნდა დავამთავროთ სხვისი დახმარების მოლოდინით ცხოვრება.

სულაც არ ვფიქრობ, რომ საქართველოში არსებული პრობლემების დაძლევა და რეფორმების გზა იქნება ადვილი. იმედი მაქვს, რომ ჩვენი საზოგადოებრივი შეგნება გაიზარდა ისე, რომ შეწყვიტოს ოცნება და აიღოს მეტი პასუხისმგებლობა.

დროა გადავდგათ ქმედითი ნაბიჯები!"