-
2015-12-07 00:12
„მე მინდა, რომ ის დაისაჯოს თაღლითური განქორწინებისთვის, რადგანაც ვიღაც სხვა პიროვნებამ ითამაშა ჩემი როლი სასამართლოში,”-ეს განცხადება გადაცემა განსხვავებულ აქცენტებში ბიძინა ივანიშვილის ყოფილმა მეუღლემ, ინგა პავლოვამ გააკეთა.
მისი თქმით, ივანიშვილი მასთან განქორწინების შემდეგაც სარგებლობდა მისი სახელით და გვარით. რუსეთში აგრძელებდა თაღლითურ საქმიანობას.
„როდესაც მან პოლიტიკაში წასვლა გადაწყვიტა 2011 წელს, მაშინ მოვკარი თვალი ტელევიზორში. ეს ჩემთვის შოკისმომგვრელი ინფორმაცია იყო. ბორისი ძალიან ჩკეტილი პიროვნება იყო, არ უყვარდა არც ინტერვიუები და არც რაიმე სხვა მსგავსი აქტივობა. არ უყვარდა ოფიციალური გამოსვლები, ყველაფერი არაოფიციალური ერჩივნა და აი უცებ, ტელევიზორში გამოაცხადეს, რომ ის პოლიტიკაში აპირებდა წასვლას, დიდი მოულოდნელობა იყო ჩემთვის.
როდესაც მოიგო არჩევნები და გახდა პრემიერმინისტრი, ვიფიქრე მივულოცავთქო, თან ვკითხავ მართალია თუ არა, რომ უკვე ჰყავდა ცოლი როცა ჩემზე იქორწინა, მართალი გითხრათ არ მჯეროდა, რომ მართლა ჰყავდა ცოლი. ვცადე მასთან დაკავშირება მისი თანაშემწის, კახი კალაძის მეშვეობით. დიდი ძალისხმევა დამჭირდა ტელეფონის ნომრის გასაგებად. დიდი ხანი ვრეკავდი, ბოლოს როგორც იქნა თავად პრემიერმინისტრს, ბიძინა ივანიშვილს დამალაპარაკეს და მან მითხრა, რომ შემდეგ კვირას გადმორეკავდა.
როდესაც ერთი კვირის შემდეგ დავურეკე მან არ მოისურვა ჩემთან საუბარი. ეს ძალიან მეწყინა. მივხვდი, რომ ის არ იყო პატიოსანი ადამიანი. მე მინდა, რომ ის დაისაჯოს თაღლითური განქორწინებისთვის, რადგანაც ვიღაც სხვა პიროვნებამ ითამაშა ჩემი როლი სასამართლოში,”- აცხადებს პავლოვა.
როგორც პავლოვა ამბობს, მას ივანიშვილის თაღლითობის დამადასტურებელი სხვა დოკუმენტებიც აქვს, რომელიც ჟურნალისტმა ვლადიმერ ივანიძემ მიაწოდა:
,,ივანიძესთან საუბრამდე არც კი ვიცოდი, რომ 1994 წლიდან 2007 წლამდე ივანიშვილის მდივანს პოლიაკოვს ჩემს სახელზე გახსნილი ჰქონდა კომპანია. მე მას ვიცნობ. სრული მოულოდნელობა იყო, რომ ვიღაცამ მოსკოვში ჩემი დოკუმენტებით ისარგებლა და ერთდროულად 2 ბანკში ვიყავი გაფორმებული თანამშრომლად.
თუ არ ვცდები ბანკ რასიისკი კრედიტში და რუსული განვითარების ბანკში. როდესაც ივანიძემ მოსკოვის საგადასახადო სამსახურიდან გამოთხოვილი დოკუმენტები გადმომცა მაშინვე ინტერნეტით ამ უწყებაში საჩივარი შევიტანე და პასუხი მივიღე, რომ რეგისტრირებული ვიყავი როგორც ბანკის თანამშრომელი. ასევე ჩემს სახელზე კომპანია იყო გახსნილი. მაშინვე განვაცხადე, რომ ეს მე არ ვიყავი. ფიზიკურადაც არ ვიყავი რუსეთში, ვერანაირად ვერ ვიმუშავებდი ამ ბანკებში, რადგან საზღვარგარეთ ვცხოვრობდი,"-ამბობს პავლოვა.