2015-11-18 07:14

ევროპისა და ევრაზიის საკითხებში აშშ-ის სახელმწიფო მდივნის თანაშემწემ ვიქტორია ნულანდმა ბერლინში ჩატარებულ უსაფრთხოების კონფერენციაზე განაცხადა, რომ რუსეთისთვის სანქციების მოხსნის საბაბი არ არსებობს, სანამ ის ყირიმს არ დააბრუნებს.

"ახლაც კი, როცა ჩვენ კონცენტრირებული ვართ "ისლამურ სახელმწიფოზე", არ უნდა დაგვავიწყდეს, რომ სულ რაღაც ერთი წლის წინ ორ მილიონზე მეტი უკრაინელი რამდენიმე დღისა და კვირის განმავლობაში, თოვლში იდგა მაიდანზე, რათა მიეღო ხელისუფლებისგან ის, რაც ჩვენ გვაქვს: ადამიანური ღირსება, დემოკრატია, არაკორუმპირებული ხელისუფლება, სამართლიანობა. როცა იანუკოვიჩმა ზურგი აქცია ევროპას, უკრაინელები არ დათანხმდნენ მათთვის არჩევანის თავისუფლების წართმევას. 

მაგრამ ეს მიუღებელი იყო როგორც იანუკოვიჩისთვის, ასევე კრემლისთვის, რომელმაც უკრაინის ხალხის მოთხოვნას ოკუპაცია, ტანკები, "ბუკები", სეპარატისტთა მხარდაჭერა, საბოტაჟი და პროპაგანდა შეაგება. ჩვენ უნდა გავაგრძელოთ ზეწოლა რუსეთზე, რათა დასრულდეს მინსკის შეთანხმებით გათვალისწინებული ვალდებულებების შესრულება, კერძოდ: ყველა მძევლის გათავისუფლება, სრულყოფილი ჰუმანიტარული დერეფანი გაეროსა და სხვა ორგანიზაციებისთვის, დონბასში თავისუფალი, სამართლიანი არჩევნების ჩატარება უკრაინის კონსტიტუციის გათვალისწინებით, ყველა უცხო ქვეყნის ჯარისა და შეიარაღების ჩამოშორება და უკრაინის დაბრუნება საერთაშორისოდ აღიარებულ საზღვრებში", - განაცხადა ნულანდმა.

სახელმწიფო მდივნის თანაშემწემ დაამატა, რომ აუცილებელია სანქციების გაგრძელება, რადგან სწორედ სანქციები გვევლინება რუსეთის პასუხისმგებლობის უზრუნველყოფის მექანიზმად, მინსკის შეთანხმებების საბოლოოდ შესრულებამდე, ხოლო ყირიმთან დაკავშირებული სანქციები უნდა გაგრძელდეს მანამ, სანამ რუსეთის ნახევარკუნძულს უკრაინას არ დაუბრუნებს. მისი თქმით, მთლიანად არაკორუმპირებული ხელისუფლების მისაღებად უკრაინაში ჯერაც წინაა მოცულობითი სამუშაოების შესრულება.

"მაგრამ ნება არის. უკრაინის ხალხი ითხოვს სწრაფ ცვლილებებს და ჩვენ მხარს ვუჭერთ ხალხს, როცა ვაუწყებთ, რომ ჩვენი შემდგომი მხარდაჭერა დამოკიდებულია კიევის უნარზე, დაამყაროს წესრიგი უკრაინაში" - განაცხადა ნულანდმა.